"ყარაბაღში, ცეცხლის შეწყვეტის შეთანხმების შემდეგ, შესაძლოა, რუსული "სამშვიდობო ძალები“ შევიდნენ" - რას ამბობს რუსი პოლიტიკოსი, სერგეი მირონოვი მთიანი ყარაბაღის კონფლიქტზე

პარტია "სამართლიანი რუსეთის“ ლიდერი, სერგეი მირონოვი ამბობს, რომ გამორიცხული არ არის, ყარაბაღში, ცეცხლის შეწყვეტის შეთანხმების შემდეგ, რუსული "სამშვიდობო ძალები“ შევიდნენ. ამის შესახებ გამოცემა ria.ru წერს.

მირონოვის თქმით, დაძველებულ კონფლიქტს ნატო-ს წევრი თურქეთი ხელოვნურად აღვივებს.

"სამწუხაროდ, ვხედავთ, რომ ნატო-ს წევრი თურქეთი აღვივებს დაძველებულ კონფლიქტს.

ვთვლი, რომ ცეცხლის შეწყვეტისა და ძალების გაყვანის შესახებ შეთანხმების შემდეგ, რუსეთის მხრიდან შესაძლოა, სამშვიდობო ძალების შეყვანა გახდეს საჭირო“, - ამბობს რუსი პოლიტიკოსი.

ცნობისთვის, მთიან ყარაბაღში საომარი მოქმედებები 27 სექტემბერს განახლდა და ამ დრომდე აზერბაიჯანსა და სომხეთს შორის ინტენსიური საბრძოლო მოქმედებები მიმდინარეობს. ორივე ქვეყანაში საომარი მდგომარეობაა გამოცხადებული.