"საქართველო გრიპის საწინააღმდეგო 250 000 ვაქცინას შეიძენს" - რას ამბობს ჯანდაცვის მინისტრი აცრების დაწყებასა და კორონავირუსით ინფიცირებულ პაციენტებზე

ჯანდაცვის მინისტრის, ეკატერინე ტიკარაძის განცხადებით, საქართველოში ბოლო 24 საათში გარდაცვლილი სამი პაციენტიდან 2 ბათუმში, ერთი კი ქუთაისში მკურნალობდა.

როგორც ეკატერინე ტაიკარაძემ კორონავირუსთან დაკავშირებით შექმნილი საკოორდინაციო საბჭოს დასრულების შემდეგ განაცხადა, კოვიდინფიცირებული 36 პაციენტის ჯანმრთელობის მდგომარეობა კრიტიკულია.

„გვაქვს სამი გარდაცვალება, 2 ბათუმში, 1 კი ქუთაისში. ამ ეტაპზე სუნთქვის აპარატზე არის 23 პაციენტი, რეანიმაციაში კი 115 პაციენტია. კრიტიკული მდგომარეობა აღენიშნება 36 პაციენტს“, - განაცხადა ეკატერინე ტიკარაძემ.

ჯანდაცვის მინისტრმა გრიპის საწინააღმდეგო ვაქცინის შესახებაც ისაუბრა და აღნიშნა, რომ საქართველო სეზონური გრიპის საწინააღმდეგო დაახლოებით 250 ათასზე მეტ ვაქცინას შეიძენს.

„ვაქცინა შეძენილია. ჩვენ კიდევ ვზრუნავთ იმაზე, რომ ვაქცინების დამატებითი რაოდენობა შევიძინოთ, ვინაიდან ვხედავთ, რომ მოსახლეობაში გაზრდილია, როგორც ნდობა, ასევე სურვილი იმისა, რომ ისინი აცრილები იყვნენ. შემდეგი ერთი კვირის მანძილზე ჩვენ უკვე ველოდებით, რომ ვაქცინის პირველი ნაწილი ქალაქში იქნება და აღნიშნულის გათვალისწინებით, მოსახლეობის ვაქცინაციას დავიწყებთ. საერთო ჯამში ჩვენ 250 ათასზე მეტ ვაქცინას შევიძენთ“, - განაცხადა ტიკარაძემ.