"არ შეგეშინდეთ კორონავირუსის... ნუ მისცემთ მას თქვენს ცხოვრებაზე გავლენის საშუალებას" - ტრამპმა კლინიკა დატოვა და თეთრ სახლში დაბრუნდა

აშშ-ის პრეზიდენტმა დონალდ ტრამპმა უოლტერ რიდის სამედიცინო ცენტრი დატოვა და თეთრ სახლში დაბრუნდა.

პრეზიდენტმა ამერიკელებს მოუწოდა, კოვიდ 19-მა არ შეაშინოთ და ვირუსს მათზე გაბატონების საშუალება არ მისცენ.

"არ მისცეთ მას თქვენზე გაბატონების საშუალება. ნუ გეშინიათ მისი. ვბრუნდებით, ვბრუნდებით სამუშაოზე, ვაპირებთ, მოწინავეები ვიყოთ, არ მისცეთ მას საშუალება თქვენს ცხოვრებაზე გაბატონდეს,“- აღნიშნა დონალდ ტრამპმა.

პრეზიდენტ ტრამპს ვერტმფრენიდან გადმოსვლისას და თეთრი სახლის კიბეზე ასვლისას პირბადე ეკეთა, თუმცა ფოტოების გადაღების წინ მან პირბადე მოიხსნა და ჯიბეში ჩაიდო.

აღსანიშნავია, რომ ტრამპმა კლინიკის დატოვებამდე "ტვიტერზე" დაწერა, რომ თავს იმაზე უკეთ გრძნობს, ვიდრე 20 წლის წინ.

"ნამდვილად კარგად ვგრძნობ თავს! არ შეგეშინდეთ კორონავირუსის. ნუ მისცემთ მას თქვენს ცხოვრებაზე გავლენის საშუალებას, ტრამპის ადმინისტრაციის პირობებში, ჩვენ შევქმენით მართლაც შესანიშნავი მედიკამენტები და გამოცდილება. თავს უკეთესად ვგრძნობ, ვიდრე 20 წლის წინ ვგრძნობდი!",- დაწერა პრეზიდენტმა.

ცნობისთვის, დონალდ ტრამპს და მის მეუღლეს, მელანია ტრამპს კორონავირუსი 2 ოქტომბერს დაუდასტურდათ. მოგვიანებით, ტრამპი სამედიცინო ცენტრში გადაიყვანეს.