"მოხდა ის, რისი რისკიც არსებობდა... თქვენი ღალატი გამომივიდა" - ინგლისურის ცნობილ პედაგოგს კორონავირუსი დაუდგინდა

ინგლისურის ცნობილ პედაგოგს, დარეჯან გურასაშვილს კორონავირუსი დაუდგინდა. ამის შესახებ ის "ფეისბუქზე" წერს.

"ჩემო საყვარელო მოსწავლეებო, მშობლებო, კოლეგებო! მოხდა ის, რისი რისკიც არსებობდა, კოვიდ 19-მა ჩემამდეც მოაღწია. სამწუხაროდ, ვერ ავირიდე. თავს ცოტა სუსტად ვგრძნობ, მაქვს სიცხე 37.5.

სხვა გამოკვეთილი სიმპტომები არ მაქვს. ინფექციურ საავადმყოფოში მაწვენენ და დიდი იმედი მაქვს, რომ მალე დაგიბრუნდებით. მინდა გთხოვოთ, რომ ძალიან გაფრთხილდეთ და დაიცვათ ყველა რეკომენდაცია, არ მოადუნოთ ყურადღება.

იმედია მაპატიებთ, რომ ჩემდაუნებურად თქვენი ღალატი გამომივიდა, დისკომფორტი შეგიქმენით ჩემს გარშემო მყოფ ადამიანებს და მიგატოვეთ დროებით, მაგრამ იმედია ყველაფერი კარგად დამთავრდება" - წერს დარეჯან გურასაშვილი.

ცნობისთვის, დარეჯან გურასაშვილი ფართო საზოგადოებამ წლების წინ გაიცნო, როდესაც სოციალურ ქსელში გავრცელდა ვიდეო, სადაც ჩანდა, რომ ქართველი მასწავლებელი ბავშვებს ინგლისურს რეპით ასწავლიდა. ვიდეო რამდენიმე საათში ინტერნეტჰიტად იქცა.

AMBEBI.GE-სთან ინტერვიუში, გურასაშვილი ამბობდა, რომ სწავლების ამ მეთოდს თავად მიაგნო და მიიჩნევს, რომ უცხო ენის მარტივად ათვისებაში პატარებს სერიოზულად ეხმარება.

დარეჯან გურასაშვილი მომღერალ ანანო მჟავიას დედაა.