"ცოცხალი და უვნებელი ვარ. უფრო ის მადარდებს, რა ფერის კოსტიუმი ჩავიცვა შენი და მიშიკოს დაკრძალვაზე" - რას წერს აზერბაიჯანელების მიერ მოკლულად გამოცხადებული ვაჰაგნ ჩახალიანი

აზერბაიჯანული მედიის ინფორმაციით, სომხეთ-აზერბაიჯანს შორის მიმდინარე დაპირისპირების დროს საქართველოს მოქალაქე ვაჰაგნ ჩახალიანი ყარაბაღში დაიღუპა. მას აზერბაიჯანულ პრესაში დაქირავებულ მებრძოლად მოიხსენიებენ. სომხურ მხარეს ეს ინფორმაცია არ დაუდასტურებია. ვაჰაგნ ჩახალიანის "ფეისბუქის" პირად გვერდზე კი გამოქვეყნდა სტატუსი, რომელშიც წერს, რომ ცოცხალია და ჯანმრთელად არის.

"მოვედი გითხრათ, რომ ამ დღეებში ქართულ და აზერბაიჯანულ (პროალიევურ და პროსააკაშვილურ) მასმედიაში გავრცელებული ინფორმაცია სინამდვილეს არ შეესაბამება...

P.S. ილიუშ (იგულისხმება ილხამ ალიევი - ს.კ.), შენმა დაზვერვამ და სომხეთსა და საქართველოში მოქმედმა აგენტურულმა ქსელმა კიდევ ერთხელ მოგიტანათ არასწორი ინფორმაცია და ამით თქვენი, სულელების დეზორგანიზება მოახდინა. როგორც ხედავთ, მე ცოცხალი და უვნებელი ვარ. და როგორც ერთ-ერთმა კლასიკოსმა თქვა, მე უფრო მეტად ის მადარდებს, თუ რა ფერის კოსტიუმი ჩავიცვა შენი და მიშიკოს დაკრძალვაზე...

P.P.S. მათ შესახებ, ვინც აზერბაიჯანში და საქართველოში იმ ფეიკური ინფორმაციით აღფრთოვანდა, ყველაფერი ისედაც გასაგებია, მაგრამ რაც შეეხება სომხეთში გახარებულებს, მათზე ომის შემდეგ...“, - წერს ვაჰაგნ ჩახალიანი.

• ვინ არის ვაჰაგნ ჩახალიანი?

ვაჰაგნ ჩახალიანი არის დემოკრატიული კავშირის "ერთიანი ჯავახკის" თავმჯდომარე. ის საქართველოს ეროვნული უშიშროების თანამშრომლებმა 2008 წლის 21 ივლისს დააპატიმრეს. რუსეთ-საქართველოს ომამდე ცოტა ხნით ადრე ახალქალაქში მღელვარება დაიწყო. 17 ივლისს თამარ მეფის ქუჩაზე, პოლიციის მაშინდელი უფროსის სახლთან აფეთქება მოხდა, არავინ დაზიანებულა, დაიმსხვრა მხოლოდ მეზობელი სახლების ფანჯრის მინები. ეჭვი ორგანიზაცია "ერთიანი ჯავახკის" წევრებზე მიიტანეს, რომლებიც 17 ივლისის ღამეს ვაჰაგნ ჩახალიანის სახლში იყვნენ შეკრებილი. ახალქალაქში კრიმინალური ხასიათის მოვლენები დაპატიმრებებით გაგრძელდა. ჩახალიანის სახლისა და "ერთიანი ჯავახკის" რადიოს შენობაში ჩხრეკის ჩატარებიდან სამი დღის შემდეგ, 21 ივლისს პოლიციის სპეციალურმა თანამშრომლებმა იარაღი იპოვეს და ვაჰაგნ ჩახალიანი, მისი ძმა და მამა დააპატიმრეს. ეს მოვლენები მოსახლეობამ პოლიციის უფროსთან სამველ პეტროსიანთან ვაჰაგნ ჩახალიანის პირად დაპირისპირებას დაუკავშირა, რასაც ის უარყოფდა.

სასამართლოს დაწყებამდე ჩახალიანს 13 ბრალდება ჰქონდა წაყენებული, რომელთა შორისაც 7 ბრალდება მოეხსნა, რადგან ისინი პროკურატურამ ვერ დაამტკიცა. დანარჩენი 6 ბრალდებით მას 10 წლით თავისუფლების აღკვეთა მიესაჯა. კერძოდ, მას ბრალად ედებოდა მასობრივ არეულობებში თანამონაწილეობა, იარაღის ტარება-შენახვა-შეძენა და ხულიგნობა.

საბოლოოდ, ჩახალიანი ქართული ოცნების" ხელისუფლებაში მოსვლის შემდეგ, 2013 წლის 24 იანვარს ციხიდან ამნისტიით გათავისუფლდა, რასაც დიდი რეზონანსი მოჰყვა. სომხურ წრეებში ეს ფაქტი ისე მიიღეს, როგორც გმირის გათავისუფლება. არაერთგვაროვანი იყო რეაქცია თავად საქართველოშიც. "ნაციონალური მოძრაობის" წარმომადგენლებმა ვაჰაგნს "საქართველოს სახელმწიფოებრიობის მთავარი მტერი" და რუსეთის სპეცსამსახურების პირდაპირი რეზიდენტი უწოდეს.

იხილეთ ვიდეო