რამდენი პოლიტიკური სუბიექტი შედის მე-10 მოწვევის პარლამენტში და ვინ რამდენ მანდატს მიიღებს - ცესკოს ყველა უბნის წინასწარი მონაცემები

ცესკოს ყველა უბნის წინასწარი მონაცემებით, მე-10 მოწვევის პარლამენტში 9 საარჩევნო სუბიექტი მოხვდება,

პროპორციული წესით 1%-იანი საარჩევნო ბარიერი ცხრა პოლიტიკურმა გაერთიანებამ გადალახა. მათ შორის, 120 პროპორციული მანდატიდან 116 მანდატი ნაწილდება. ოთხი თავისუფალი მანდატი რჩება, რომელსაც თანმიმდევრობით, უდიდესი ნაშთის მქონე შემდეგი პოლიტიკური სუბიექტები გაინაწილებენ: - “გირჩი“, “ევროპული საქართველო“, "ნაციონალური მოძრაობა“ და “ალეკო ელისაშვილი - მოქალაქეები“.

ცესკოს მიერ გამოქვეყნებული მონაცემებით, პროპორციული სისტემით განსაზღვრული დანარჩენი 116 მანდატი პარტიებს შორის ასე ნაწილდება:

• “ქართული ოცნება“ (48.15%) - 61 მანდატი
• “ნაციონალური მოძრაობა - გაერთიანებული ოპოზიცია“ (27.14%) - 34 მანდატი
• “ევროპული საქართველო“ (3.78%) - 4 მანდატი
• “ლელო“ (3.15%) - 4 მანდატი
• “პატრიოტთა ალიანსი“ (3.14%) - 4 მანდატი
• “სტრატეგია აღმაშენებელი“ (3.15%) - 4 მანდატი
• “გირჩი“ (2.89%) - 3 მანდატი
• “ალეკო ელისაშვილი - მოქალაქეები“ (1.33%) - 1 მანდატი
• “ლეიბორისტული პარტია“ (1%) - 1 მანდატი

ცნობისთვის, კონსტიტუციასა და საარჩევნო კანონმდებლობაში განხორციელებული ცვლილებებით, პროპორციული წესით საპარლამენტო მანდატების გადანაწილების ფორმულა ასეთია: - პოლიტიკური პარტიის, ან საარჩევნო ბლოკის მიერ მიღებული მანდატების რაოდენობის დასადგენად, მის მიერ მიღებული ნამდვილი ხმების რაოდენობა მრავლდება 120-ზე და იყოფა ყველა იმ პოლიტიკური პარტიისა და საარჩევნო ბლოკის მიერ მიღებული ნამდვილი ხმების რაოდენობათა ჯამზე, რომლებმაც შესაბამისი საარჩევნო ბარიერი გადალახეს. მიღებული რიცხვის მთელი ნაწილი არის პოლიტიკური პარტიის და საარჩევნო ბლოკის მიერ მიღებული მანდატების რაოდენობა.