უელსის ნაკრების მთავარი მწვრთნელი და "მანჩესტერ იუნაიტედის“ ლეგენდა, რაიან გიგზი მეგობარ ქალზე ძალადობის გამო დააკავეს

ვეტერანი უელსელი ფეხბურთელი, რაიან გიგზი, რომელიც წლების განმავლობაში "მანჩესტერ იუნაიტედის“ ღირსებას იცავდა, ახლა კი უელსის საფეხბურთო ნაკრების მთავარი მწვრთნელია, დააკავეს. ამის შესახებ "ინდეფენდენთი“ წერს.

გამოცემის ცნობით, დაკავების მიზეზი მეგობარ ქალზე ძალადობაა. 46 წლის გიგზი პოლიციის განყოფილებაში მას შემდეგ გადაიყვანეს, რაც სამართალდამცველები სახლში გიგზის მეგობარმა ქალმა, ქეით გრევილმა თავად გამოიძახა.

პოლიციაში აცხადებენ, რომ განყოფილებაში შეტყობინება 1-ელ ნოემბერს, საღამოს 10:00 საათზე შევიდა. მათივე ცნობით, 30 წელს გადაცილებულმა ქალმა ძალადობის შედეგად ტრავმები მიიღო, თუმცა ექიმის დახმარება არ დასჭირვებია.

გიგზი გირაოს სანაცვლოდ უკვე გაათავისუფლეს.

აღსანიშნავია, რომ გიგზი გამოირჩევა პირადი ცხოვრების სკანდალებით და ის არაერთხელ გამხდარა მედიაში განხილვის საგანი. 2018 წელს პრესაში წერდნენ, რომ გიგზი თავის ცოლს საკუთარი ძმის ცოლთან ღალატობდა.