"სააკაშვილი მაინც და მაინც მურუსიძეს უნდა გავასამართლებინოთ?" - რას ფიქრობენ სააკაშვილის შესაძლო ჩამოსვლაზე "ლელოსა" და "სტრატეგია აღმაშენებელში"

ის ოპოზიციური პარტიები, ვინც ბარიერი გადალახა და მანდატები მოიპოვა, შეთანხმდნენ, რომ პარლამენტში არ შევლენ. განსაკუთრებით აქტიურია ექსპრეზიდენტი სააკაშვილი, რომელიც აშკარაა, რომ პროცესების ორკესტრირებას ცდილობს. მისი თქმით, თუ ქართული ოპოზიციური ერთობა ჩათვლის, რომ ივანიშვილის დასამარცხებლად მისი ჩამოსვლა იქნება ერთ-ერთი იარაღი, საქართველოში შემოღწევის საშუალებას იპოვის. თუმცა ოპოზიციური ერთობის წარმომადგენელთა ნაწილის თქმით, ეს მხოლოდ ამ ერთობას შეუშლის ხელს, თუმცა ნაწილს ეს აზრი მოსწონს კიდეც. ჩვენ დავინტერესდით "ლელოს" და "სტრატეგია აღმაშენებლის" წარმომადგენელთა აზრით:

თაკო ჩარკვიანი, "სტარტეგია აღმაშენებელი":

- იცით ჩემი დამოკიდებულება მიხეილ სააკაშვილის მიმართ. მე არასოდეს დამიმალავს ჩემი სიმპათიები მიშას, როგორც პოლიტიკოსის მიმართ. ყველას შეუძლია იფიქროს ჩამოსვლაზე, მაგრამ ამ ეტაპზე როგორ შემოვა? თუკი ჩვენ ვამბობთ რომ სასამართლო არ გაგვაჩნია და კითხვის ნიშნის ქვეშ ვაყენებთ ამ ინსტიტუტს, მითხარით, მაშინ ყოფილი პრეზიდენტი დასაჭერად ხომ არ უნდა ჩამოიყვანოთ საქართველოში? სააკაშვილი მაინც და მაინც მურუსიძეს უნდა გავასამართლებინოთ? ყოველთვის მივესალმები ისე, მიხეილ სააკაშვილის ჩამოსვლას საქართველოში, ნიჭიერი კაცია და საქართველოს დასაკარგი ქართველები სად ჰყავს.

კახა კოჟორიძე, პარტია "ლელო":

- მთელი ოპოზიცია, ის პარტიები, რომლებმაც მოიპოვეს საპარლამენტო მანდატები და ისინიც, ვინც ვერ მოიპოვა და გარეთ დარჩა, შევთანხმდით ერთ რამეზე, რომ ეს არჩევნები და მისი შედეგები ვერ ასახავს ქართველი ხალხის ნებას. არჩევნები გაყალბდა. მოსყიდვებით, დაშინებით, შანტაჟით, ოქმების შეცვლით ტოტალურად შეიცვალა ქართველი ხალხის ნება. სწორედ ამიტომ შედგა ერთობლივი შეთანხმება. იმ პარტიებმა, რომლებმაც მანდატები მოიპოვეს, განაცხადეს, რომ პარლამენტში არ შევლენ და ეს არის მათი საბოლოო გადაწყვეტილება. ჩვენ თავიდანვე განვაცხადეთ, მათ შორის მამუკა ხაზარაძემ, რომ სააკაშვილთან და ივანიშვილთან "ლელო" კოალიციას არ შექმნიდა. პარტიაში არ გვიმსჯელია სააკაშვილის ჩამოსვლა - არჩამოსვლის საკითხზე და მის როლთან დაკავშირებით. არც ვფიქრობთ, რომ საჭიროა "ლელოს" მხრიდან ამ თემაზე მსჯელობა. ჩვენ გვაქვს ჩვენი ამოცანა - დავაფიქსიროთ ჩვენი პოზიცია, რაც დავინახეთ ამ არჩევნებზე და არ შევეგუოთ ამ გაყალბებას. იმის გამო, რომ მიშა იგივეს ამბობს, მე არ ვთქვა ჩემი სათქმელი? - ეს გამორიცხულია. არანაირად არ მაწუხებს კომპლექსები. რაც სათქმელია და სიმართლეა, ყოველთვის იმას ვიტყვი და არ მაინტერესებს, იგივე აზრი მიშას აქვს, პეტრეს თუ პავლეს.

არის საკითხები, სადაც თანამშრომლობა შესაძლებელია "ნაცმოძრაობასთანაც". დღევანდელი მოცემულობა არის ის რომ, სააკაშვილს შეფარდებული აქვს პატიმრობა და მისი ჩამოსვლის შემთხვევაში მას აუცილებლად დააკავებენ. იურიდიულად ასეთია მოცემულობა. დანარჩენი, ჩამოვა თუ არა, ეს მისი გადასაწყვეტია. ვერც მოვუწოდებ და ვერც ხელს შევუწყობ.