სამჯერ შეთანხმების მიუხედავად, მთიან ყარაბაღში საბრძოლო მოქმედებები არ წყდება - რას ამბობენ მხარეები?

აზერბაიჯანის თავდაცვის უწყების ინფორმაციით, გასული დღე-ღამის განმავლობაში საბრძოლო მოქმედებები, ძირითადად, ტარტარის, აღდამის, ხოჯევანდის, ზანგილანისა და გუბადლის მიმართულებებით გრძელდებოდა.

მათივე ცნობით, სომხეთის შეიარაღებულმა ძალებმა ცოცხალი ძალისა და ტექნიკის მნიშვნელოვანი დანაკარგი განიცადეს.

„გუშინდელი დღისა და ღამის განმავლობაში მტრის ორი T-72 ტიპის ტანკი, სამი D-30-ი ტიპის საზენიტო მოწყობილობა, ერთი ტაქტიკური უპილოტო საფრენი აპარატი და სამი სამხედრო სატვირთო ავტომობილი გავანადგურეთ,“ - აღნიშნულია აზერბაიჯანის თავდაცვის უწყების განცხადებაში.

მათივე ინფორმაციით, ამ დროისთვის აზერბაიჯანის ჯარი ოპერატიულ ვითარებას აკონტროლებს.

რაც შეეხება სომხურ მხარეს, როგორც თავდაცვის სამინისტროს პრესსპიკერი შუშან სტეპანიანი სოციალურ ქსელ "ფეისბუქში" წერს, "ქალაქ შუშის მიმართულებით აზერბაიჯანის არმიის ქვედანაყოფის განეიტრალების ოპერაცია მიმდინარეობს".

დღეს დილით არსებული სიტუაციის შესახებ ინფორმაცია გაავრცელა აზერბაიჯანის თავდაცვის სამინისტრომაც, რომლის თანახმადაც, სომხეთის შეიარაღებული ძალები 08:05 საათიდან ტერტერის რეგიონების რამდენიმე სოფელს ბომბავენ.

შეგახსენებთ, მიუხედავად იმისა, რომ სომხეთი და აზერბაიჯანი ცეცხლის შეწყვეტის შესახებ 27 სექტემბრის შემდეგ სამჯერ შეთანხმდნენ, მთიან ყარაბაღში საბრძოლო მოქმედებები არ წყდება, რაშიც მხარეები ერთმანეთს ადანაშაულებენ.