ახალგაზრდობიდან დღემდე - ბაიდენისა და ტრამპის ცხოვრების 7 ათწლეული და ფოტოებით მოყოლილი ისტორია

3 ნოემბერს აშშ-ში საპრეზიდენტო არჩევნები გაიმართა, სადაც ერთმანეთს "რესპუბლიკელების“ კანდიდატი, 74 წლის დონალდ ტრამპი და "დემოკრატების" კანდიდატი, 77 წლის ჯო ბაიდენი დაუპირისპირდნენ. სანამ შედეგებს გავიგებთ, გადავხედოთ მათ ცხოვრებას, ადრეული პერიოდიდან დღემდე.

• ადრეული წლები

დონალდ ტრამპი 1946 წელს, მდიდარი ნიუ-იორკელების, ფრედ ტრამპისა და მერი ენ მაკლეოდ ტრამპის ოჯახში დაიბადა. მიუხედავად სიმდიდრისა, დონალდი მამის უძრავი ქონების კომპანიაში შავ სამუშაოს ასრულებდა. როცა 13 წლის იყო, სამხედრო აკადემიაში გაგზავნეს სკოლაში "შეუსაბამოდ მოქცევის" გამო. დონალდი პენსილვანიის უნივერსიტეტში სწავლობდა. მალე მამის ფავორიტი გახდა და სწორედ მას ანდო ბიზნესის მართვა.

ჯო ბაიდენი პენსილვანიაში 1942 წელს კათოლიკე ირლანდიელი ამერიკელების ოჯახში დაიბადა. ახალგაზრდა ჯოს მეტყველების პრობლემა ჰქონდა და ეს მისი მთავარი გამოწვევა იყო, რომელიც წარმატებით დაძლია. ბევრს ვარჯიშობდა სარკის წინ და შედეგიც მალე მიიღო. ბაიდენი ჯერ დელავერის უნივერსიტეტში სწავლობდა, ხოლო შემდეგ სამართლის ფაკულტეტზე სირაკუზის უნივერსიტეტში.

• 1970-იანი წლები

1971 წელს დონალდ ტრამპმა მამის უძრავი ქონების კომპანიას "ტრამპის ორგანიზაცია" დაარქვა. 6 წლის შემდეგ მან ივანა ზელნიჩკოვაზე იქორწინა, რომელიც ჩეხი სპორტსმენი და მოდელი იყო. ამ ქორწინებიდან დონალდს ჰყავს უმცროსი დონალდი, ივანკა და ერიკ ტრამპები.

ამ პერიოდში ჯო ბაიდენი მოუთმენლად ელოდა თავის ადგილს აშშ-ის სენატში. ის 1972 წელს სენატორი გახდა. 70-იან წლებს უკავშირდება მისი ოჯახის უდიდესი ტრაგედია - ბაიდენის ცოლი და შვილი ავტოავარიაში დაიღუპნენ, ხოლო ვაჟები, ბიუ და ჰანთერი სერიოზულად დაშავდნენ. ბაიდენმა სენატორის პირველი ფიცი დადო საავადმყოფოს იმ ოთახიდან, სადაც მისი ვაჟები ავარიის შემდეგ მკურნალობდნენ.

• 1980-იანი წლები

ამ პერიოდში დონალდ ტრამპმა კიდევ უფრო გაზარდა თავისი ქონება და ნამდვილი იმპერია შექმნა. 1983 წელს მან მეხუთე ავენიუზე ცნობილი 68 სართულიანი "ტრამპთაუერი“ გახსნა. მისი ბრენდი უკვე მძლავრი იყო და ბიზნესმენ დონალდ ტრამპის მიმართ მედიის ინტერესიც უფრო მეტად იზრდებოდა.

რაც შეეხება სენატორ ბაიდენს, ცოლის გარდაცვალებიდან 14 წლის შემდეგ, მან კვლავ აიწყო პირადი ცხოვრება და სკოლის მასწავლებელ ჯილ ჯეიკობსზე იქორწინა, რომელთანაც კიდევ ერთი შვილი, ეშლი შეეძინა. 80-იან წლებში ჯო ბაიდენმა თავი დაიმკვიდრა სეტანის იუსტიციის კომიტეტში. 1987 წელს პირველად გადაწყვიტა შეერთებული შტატების პრეზიდენტობაზე კენჭისყრა, თუმცა მოგვიანებით კანდიდატურა მოხსნა.

• 1990-იანი წლები

ამ დროს ტრამპი მსოფლიოში უკვე ერთ-ერთი ყველაზე მდიდარი ადამიანია და აქტიურად ერთვება შოუ-ბიზნესის სექტორში. მის პირად ცხოვრებაში უამრავი ქალი ჩნდება და პრესაში არაერთი ამბავი იწერება სასიყვარულო ურთიერთობებზე სხვადასხვა მოდელებთან. 1993 წელს, მას შემდეგ რაც დონალდი ცოლს დაშორდა, ის მსახიობ მარლა მეიპლიზე დაქორწინდა. 1999 წელს ისინი ერთმანეთს დაშორდნენ, ჰყავთ ერთი საერთო შვილი, ტიფანი. ამავე წელს დონალდის მამა გარდაიცვალა. "მამაჩემი ჩემი შთაგონების წყარო იყო“ - ამბობდა ტრამპი მამის გარდაცვალების შემდეგ.

რაც შეეხება ბაიდენს, 1991 წლის 11 ოქტომბერს ერთ-ერთი ყველაზე გახმაურებული საქმის მოსმენა გაიმართა, ოკლაჰომას უნივერსიტეტის პროფესორმა, ანიტა ჰილმა ჩვენება მისცა სენატის იუსტიციის კომიტეტს. მოსმენა ეხებოდა აშშ-ის უზენაესი სასამართლოს მოსამართლედ კლარენს ტომასის კანდიდატურას. ჰილი კი აცხადებდა, რომ მან ბევრჯერ სცადა სექსუალური შევიწროება, როდესაც ორივე ერთად რონალდ რეიგანის ადინისტრაციაში მუშაობდნენ.

კომიტეტის თავმჯდომარე ჯო ბაიდენი იყო. მაშინ ანიტა ჰილს არავინ დაუჯერა. აღნიშნულის გამო, წლების განავლობაში ბაიდენი კრიტიკის ობიექტი იყო. 2019 წელს ერთ-ერთ სატელევიზიო ინტერვიუში ბაიდენმა თქვა, რომ ის ძალიან წუხს მაშინდელი გადაწყვეტილების გამო.

• 2000-იანი წლები

2005 წელს დონალდ ტრამპი მელანია კნაუსზე დაქორწინდა და კვლავ მედიის მთავარი ყურადღების ცენტრში მოექცა. წყვილს ერთი ვაჟი, ბარონ უილიამ ტრამპი ჰყავს.

2008 წლის 23 აგვისტოს ბარაკ ობამამ ჯო ბაიდენი ვიცე-პრეზიდენტად წარადგინა. ამ წყვილმა ორი საპრეზიდენტო ვადის განმავლობაში მართა აშშ. ბაიდენი ბარაკ ობამას თავის ძმას უწოდებს.

• 2010-იანი წლები

2015 წელს ოფიციალურად გახდა ცნობილი, რომ დონალდ ტრამპი აშშ-ის არჩევნებში მონაწილეობას აპირებდა. ამ პერიოდში მედიაში ჩნდება არაერთი მასალა იმის შესახებ, თუ რამდენად „უზნეო განცხადებებს" აკეთებს ტრამპი ქალების მიმართ, როგორ ექცევა ზოგადად ადამიანებს. მედია წერდა, რომ ის შეუფერებელი კანდიდატი იყო ამერიკის პრეზიდენტობისთვის. ტრამპის გამარჯვებას არავინ მოელოდა, თუმცა მიუხედავად ყველაფრისა, 2016 წელს არჩევნებში გაიმარჯვა და 2017 წლის 20 იანვარს ოფიციალურად შედგა მისი ინაუგურაცია - დონალდ ტრამპი აშშ-ის 45-ე პრეზიდენტი გახდა.

რაც შეეხება ბაიდენს, თავისი პრეზიდენტობის ბოლო დღეებში ბარაკ ობამამ სპეციალური ცერემონია მოაწყო, სადაც ის პრეზიდენტის თავისუფლების მედლით დააჯილდოვა, რომელიც უმაღლესი ჯილდოა. 2015 წელს 46 წლის ასაკში ჯო ბაიდენის ვაჟი ბიუ, სიმსივნის დიაგნოზით გარდაიცვალა. ის აშშ-ის პოლიტიკის ამომავალ ვარსკვლავად მიიჩნეოდა.

• 2020 წელი

დღეს ეს ორი აშშ-ის პრეზიდენტობისთვის იბრძვის. აირჩევენ ტრამპს პრეზიდენტად მეორე ვადით, თუ ამერიკას ახალი პრეზიდენტი ეყოლება - ამის გაგებამდე რამდენიმე საათი დარჩა.