"ეს საკენკი ბიძინა ივანიშვილმა უნდა აკენკოს" - ისნის საოლქო კომისიასთან აქციის მონაწილეებმა გალია მიიტანეს

ისნის საოლქო საარჩევნო კომისიის შენობასთან, "სტრატეგია აღმაშენებლის" ახალგაზრდული ფრთის აქტივისტებმა აქცია-პერფორმანსი მოაწყვეს.

აქციის მონაწილეებს ადგილზე მოტანილი აქვთ გალია, რომელიც, მათივე თქმით, სიმბოლურად ციხეს გამოხატავს.

მათ გალიაში მოათავსეს ფურცელზე დაწერილი საოლქო საარჩევნო კომისიის წევრების სახელები და აღნიშნეს, რომ ყველა ეს ადამიანი არჩევნების გაყალბებისთვის ციხეში უნდა იჯდეს.

"ქართველ ხალხს ცდილობენ საკენკი დაუყარონ, თუმცა ეს საკენკი ბიძინა ივანიშვილმა უნდა აკენკოს", - განაცხადეს აქციის მონაწილეებმა.

მათივე განცხადებით, კომისიის წევრებმა განუხილველად დატოვეს ყველა ის საჩივარი, რომელიც წარდგენილი იყო.