"სააკაშვილი ცდილობს, თუ რამე პრობლემებია პარტიაში, ჩააცხროს და დაალაგოს" - რა ხდება "ნაციონალურ მოძრაობაში"?

ოპოზიციური პარტიები კვლავ აცხადებენ, რომ 31 ოქტომბრის საპარლამენტო არჩევნების შედეგები გაყალბებულია, რის გამოც პარლამენტში შესვლაზე უარს ამბობენ და ვადამდელი არჩევნების დანიშვნას ითხოვენ. მაგრამ აშკარაა, რომ მათ პოზიციას საზოგადოების მნიშვნელოვანი ნაწილი არ იზიარებს. არსებული მდგომარეობით, ამავე აზრზე არიან ჩვენი დასავლელი პარტნიორები, რომლებიც საარჩევნო პროცესის ხარვეზებზე მიუთითებენ, თუმცა შედეგებს მაინც ლეგიტიმურად მიიჩნევენ.

პროტესტის ფლაგმანად, როგორც მოსალოდნელი იყო, მოგვევლინა "ნაციონალური მოძრაობა“, თუმცა, როგორც ჩანს, სამოქმედო გეგმის თაობაზე აზრთა სხვადასხვაობა იქაც არის.

პარტიის თავმჯდომარის გრიგოლ ვაშაძის განცხადებამ დიდი რეზონანსი გამოიწვია ზოგადადაც და პარტიის შიგნითაც.

• რა თქვა ვაშაძემ?

გრიგოლ ვაშაძემ გაავრცელა შემედეგი განცხადება:

"საქართველო ძალზედ სახიფათო მდგომარეობაში იმყოფება - სახეზეა ოთხი უმძიმესი გამოწვევა - ეკონომიკური, სოციალური, პოლიტიკური და დემოგრაფიული. ამას ემატება კორონავირუსის კონტროლიდან გასული მსოფლიო ეპიდემია. ამავე დროს, უკიდურესად გამწვავებულია სამხედრო-პოლიტიკური სიტუაცია ჩვენს რეგიონში. საქართველოში კი ეროვნული კონსოლიდაციის ნაცვლად საქმე გვაქვს პოლიტიკური პროცესის უკიდურეს გამწვავებასთან, რომელსაც შიშის მომგვრელი სისწრაფით მივყავართ სამოქალაქო დაპირისპირებისა და ქაოსისკენ.

თუ საქართველოს პოლიტიკური სპექტრი არ გააცნობიერებს არსებული საფრთხეების სიღრმეს, იმას, თუ საით მიექანება ჩვენი სახელმწიფო, არ გაითვალისწინებს მოქალაქეების აბსოლუტური უმრავლესობის დაკვეთას, არ მიაქცევს ყურადღებას არასამთავრობო სექტორის რჩევებს, და იმას თუ რას გვთავაზობენ ჩვენი მოკავშირეები თავისი დიპლომატიური წარმომადგენლობის მეშვეობით, ანუ აუცილებელი ცვლილებების უზრუნველყოფას დემოკრატიული პროცესის მშვიდობიანი განვითარების გზით, ჩვენ დავკარგავთ სახელმწიფოს სტაბილური და უსაფრთხო განვითარების გზაზე გაყვანის შანსს.

მივმართავ ყველა პოლიტიკურ პარტიას: სასწრაფოდ გადავიტანოთ პროცესი მოლაპარაკების მაგიდასთან, ჩავანაცვლოთ ქუჩა ყველა დონის საკონონმდებლო ორგანოების ტრიბუნით და ყველა ძალას მოვუხმოთ სახელმწიფოს ღრმა კრიზისიდან გამოსაყვანად.

ამისათვის კი აუცილებლად მიმაჩნია, რომ ჩვენ სტრატეგიულ პარტნიორებთან ერთად ბოლომდე მივიყვანოთ სადაო უბნების გადათვლისა და სასამართლოების მიერ ოპოზიციის საჩივრების განხილვის პროცესი, რაც მოგვცემს საშუალებას დავასრულოთ ეს პოლიტიკური კრიზისი ოპოზიციის წარმომადგენლების სამართლიანი გამარჯვებით და პარლამენტში უმრავლესობის მოპოვებით.

ცესკო-ს თავჯდომარე უნდა გადადგეს.

მომავალ პარლამენტში კი უნდა შეიქმნას საგამოძიებო კომისია, რომელიც შეისწავლის დარღვევებს მიმდინარე არჩევნებში, გამოავლენს პასუხისმგებელ პირებს და უზრუნველყოფს ისეთი საარჩევნო სისტემისა და გარემოს შექმნას, რომელიც ერთხელ და სამუდამოდ გამორიცხავს გაყალბებებს და ამომრჩეველთა ხმების მითვისების შესაძლებლობას.

ჩვენ პირველ რიგში ვართ ქართველები, ანუ მრავალი ეთნიკური, რელიგიური თუ სხვა კუთვნილების საქართველოს მოქალაქეები, და მხოლოდ ამის შემდეგ პოლიტიკური პარტიების წევრები.

პირველ ადგილზე სამშობლოა და შემდეგ პოლიტიკა და პარტიული ინტერესები.

გავაკეთოთ არჩევანი სამშობლოს უსაფრთხო და ბედნიერი მომავალის სასარგებლოდ.

არავის, არც ხელისუფლებას, არც ოპოზიციას, მიუხედავად ოპოზიციის დასაბუთებული არგუმენტებისა და პროტესტისა, არ აქვს უფლება შეეგუოს უმართავი პროცესების განვითარებას.

საქართველო უპირველეს ყოვლისა!"

სწორედ ამ განცხადებას მოჰყვა უკიდურესად მკაცრი გამოხმაურება "ნაციონალურ მოძრაობაში“, ლიდერები ერთმანეთის მიყოლებით აცხადებდნენ, რომ ეს არ ყოფილა მათთან შეთანხმებული.

“ნაციონალური მოძრაობის“ მაჟორიტარობის კანდიდატმა, ნანუკა ჟორჟოლიანმა გრიგოლ ვაშაძის განცხადების გავრცელების შემდეგ "ფეისბუქის“ პირად გვერდზე დაწერა:

"თუ ეს განცხადება მართალი აღმოჩნდება და ეს ადამიანი პარტიის თავმჯდომარედ დარჩება, მიმიფურთხებია ამ პარტიისთვის!“

• რამდენად ღრმაა პარტიაში განხეთქილება? - ამის გასარკვევად უპირველესად ნანუკა ჟორჟოლიანს დავუკავშირდით

"რა განხეთქილება, რასაც ვფიქრობდი, დავწერე და ახალი რა უნდა ვთქვა, სად ხედავთ განხეთქილებას? ჩემი აზრით, განხეთქილება მოსაძებნია ირაკლი კობახიძის ვარცხნილობაში. პრობლემები რა არის, ჩვენ ხომ ცხვრები არ ვართ, ყველა ერთნაირად არ ვფიქრობთ - ვაშაძე ასე ფიქრობს და ჩვენ არ ვეთანხმებით. ცხვრები ბიძინას ჰყავს ივანიშვილს, ყველა რომ ერთნაირად ფიქრობს, თორემ ჩვენთან თავისუფალი ამბავია, ყველას შეუძლია დამოუკიდებლად იფიქროს, დამოუკიდებლად საკუთარი პოზიციები ჰქონდეს. თან კიდევ ყველაზე მთავარი ის არის, ველოდები, რომ გააკეთოს განმარტება - ეს ხომ არ ყოფილა პარტიის განცხადება?“ - აღნიშნა ჟორჟოლიანმა.

ვაშაძეს მალევე მოუწია განმარტების გაკეთება, სადაც აღნიშნა, რომ ის კვლავაც რჩება ქუჩის პროტესტის მომხრე, თუმცა ამ თითქოს ერთი დეტალიდანაც კარგად გამოჩნდა, რომ ექსმმართველ პარტიაში მთლად ყველაფერი დალაგებულად არ უნდა იყოს.

AMBEBI.GE თემაზე ესაუბრა ექსპერტ გია ხუხაშვილსაც, რომელიც ზოგადად, იზიარებს ვაშაძის პოზიციას იმასთან დაკავშირებით, რომ პოლიტიკური პროცესი ქუჩით არ წყდება.

"სიმართლე გითხრათ, ძალიან ღრმად არ შევიდოდი და არ განვიხილავდი ამას რაღაც განსაკუთრებულ სკანდალად, რადგან ერთი, რომ პარტიული დისციპლინა გარკვეულწილად მორღვეულია, ის პარტიის თავმჯდომარეა და როდესაც მინიმუმ, პარტიაში განხილული არ არის და ის თავის მოსაზრებებს საუბრობს, პრინციპში, ეს უკვე თავისთავად ანომალიაა. თუმცა, ის ადამიანია, მოქალაქეა და სრული უფლება აქვს, ჰქონდეს თავისი აზრი, რასაც მე პირადად ვიზიარებ, რადგან ქუჩით არ წყდება პოლიტიკური პროცესი, მრავალკომპონენტიანია ეს ბრძოლა და ყველა კომპონენტი უნდა იყოს გამოყენებული. საბოლოო ჯამში, ჩვენ უნდა ვიპოვოთ საერთო ენა, დიალოგში უნდა გადავიდეს სადღაც და რაღაც კონსენსუსი უნდა შედგეს. შესაბამისად, შინაარსში მე ვაშაძის პირველი განცხადების პათოსს ვიზიარებ, კორექციაც გასაგებია, რატომ მოხდა, რადგან ის ფაქტობრივად, პარტიულ ხაზთან წინააღმდეგობაში მოვიდა“, - განაცხადა ხუხაშვილმა.

მანვე კომენტარი გააკეთა მიხეილ სააკაშვილის მიერ დაწერილ გამოხმაურებაზეც, რომლის თანახმადაც ის გრიგოლ ვაშაძის მიერ გავრცელებულ განმარტებას სრულად ეთანხმება და დასძენს: "უკომპრომისო ბრძოლა გამარჯვებამდე!“

"გასაგებია, ამით ფაქტობრივად, სააკაშვილი ცდილობს, თუ რამე პრობლემებია პარტიაში, ისინი ჩააცხროს და დაალაგოს, ესეც გასაგებია. პრინციპში, გარკვეული რყევები და აზრთა სხვადასხვაობა სტრატეგიასთან დაკავშირებით პარტიაში არის და ეს შიდაპარტიული კრიზისის ფარგლებში კულისებიდან გარეთ გამოვიდა. თუმცა, აქედან გრძელვადიან დასკვნებს არ გავაკეთებდი და არ დავასკვნიდი, რომ ეს ისეთი განხეთქილებაა, რასაც შეიძლება რაიმე კრიტიკული განვითარება მოჰყვეს, ყოველ შემთხვევაში, ამ ეტაპზე ეს არ იგრძნობა. დანარჩენი მათი სამზარეულოს საქმეა“, - აღნიშნა გია ხუხაშვილმა.