თენგიზ ცერცვაძე მის მიმართ გამოჩენილი ყურადღებისთვის პრეზიდენტს მადლობას უხდის - "თქვენი ფაქტორი მნიშვნელოვანია გამოწვევების დაძლევაში"

ინფექციური საავადმყოფოს გენერალურ დირექტორი თენგიზ ცერცვაძე საქართველოს პრეზიდენტს გამოჩენილი ყურადღებისთვის მადლობას უხდის. ამის შესახებ ცერცვაძის განცხადებაშია ნათქვამი, რომელსაც ინფექციური პათოლოგიის და შიდსის ცენტრი ავრცელებს.

"თქვენო აღმატებულებავ, ქალბატონო პრეზიდენტო,უდიდეს მადლობას მოგახსენებთ თქვენს მიერ გამოხატული ყურადღებისა და თანადგომისათვის ჩემს ჯანმრთელობასთან დაკავშირებით, აგრეთვე ჩვენი მოკრძალებული საქმიანობის პოზიტიური შეფასებისთვის.

მინდა დაგიდასტუროთ ჩემი უდიდესი პატივისცემა და სრული მხარდაჭერა თქვენს უაღრესად საპასუხისმგებლო საქმიანობაში საქართველოს სახელმწიფოს და ქართველი ხალხის საკეთილდღეოდ.

დღეს ჩვენი ქვეყანა დგას უდიდესი გამოწვევების (მათ შორის პანდემიის) წინაშე და თქვენი, როგორც პრეზიდენტის და პიროვნების ფაქტორი ამ გამოწვევების წარმატებით დაძლევაში მნიშვნელოვანია" - ნათქვამია განცხადებაში.

ცნობისთვის, გუშინ საქართველოს პრეზიდენტი სალომე ზურაბიშვილი თენგიზ ცერცვაძის კორონავირუსით ინფიცირებას სოციალური ქსელით გამოეხმაურა და სწრაფად გამოჯანმრთელება უსურვა.

„ბატონ თენგიზს კორონავირუსი დაუდგინდა. მსუბუქი ფორმაა და სახლში მკურნალობს. მინდა სწრაფი გამოჯანმრთელება ვუსურვო! მინდა, პირადად ვუთხრა მადლობა მისი თავდადებისთვის, კორონასთან ათთვიანი, დღე და ღამე შეუპოვარი ბრძოლისთვის!

მინდა ბოდიში მოვუხადო მათ მაგივრად, ვინც მადლიერების ნაცვლად, ექიმების ლანძღვა და შეურაცხყოფა არჩია. ბატონო თენგიზ, საზოგადოების უდიდესი ნაწილი მადლობას გიძღვნით და თქვენთვის ლოცულობს!

მხნედ იყავით! მალე დაუბრუნდით ამ ბრძოლას!“,- დაწერა სალომე ზურაბიშვილმა.