რუსთავში, კორპუსის მე-7 სართულიდან გადმოვარდნილი 2 წლის ბავშვი გარდაიცვალა - რა ამბობენ მეზობლები?

რუსთავში, საცხოვრებელი კორპუსის მე-7 სართულიდან გადმოვარდნილი მცირეწლოვანი გარდაიცვალა. ამის შესახებ Ambebi.ge-ს "კლინიკა რუსთავში" განუცხადეს.

"სამწუხაროდ, გადარჩენა ვერ მოხერხდა", - განაცხადეს სამედიცინო დაწესებულებაში.

2 წლის ბავშვი რუსთავში, მე-19 მიკრორაიონში, საცხოვრებელი კორპუსის მეშვიდე სართულიდან დღეს დილით გადმოვარდა. ადგილობრივების თქმით, ბავშვი უმოაჯირო აივნიდან გადმოვარდა. მცირეწლოვანი სასწრაფო-სამედიცინო დახმარების ბრიგადამ მძიმე მდგომარეობაში კლინიკა „რუსთავში“ გადაიყვანა. მას ამ დრომდე უტარდებოდა ოპერაცია, რა დროსაც გარდაიცვალა.

საქმეზე გამოძიება სსკ-ის 124-ე მუხლით მიმდინარეობს, რაც გაუფრთხილებლობით ჯანმრთელობის ნაკლებად მძიმე ან მძიმე დაზიანების მიყენებას გულისხმობს.