"ამბობს, არ მინდა, ჩემმა 12 წლის შვილმა გაიაროს იგივე გზა, რაც მეო" - ადვოკატის თქმით, თავდამსხმელს ხელყუმბარის ფორმის სანთებელა ეჭირა და ფულს არ ითხოვდა

31 წლის ლევან ზურაბიშვილს, რომელმაც გუშინ მთელი საზოგადოების ყურადღება მიიპყრო, ირკვევა, რომ ხელში ხელყუმბარა არ ეჭირა. მას უბრალოდ, ყუმბარის ფორმის სანთებელა ჰქონდა და ხელყუმბარის იმიტაცია გააკეთა. ამის შესახებ მისი ადვოკატი ირმა ჭკადუა საუბრობს. მას შემდეგ, რაც ლევან ზურაბიშვილი დააკავეს, ცნობილმა იურისტმა თავად გამოთქვა სურვილი უანგაროდ დაეცვა ბრალდებული. დაკავებულს ბრალს იარაღის უკანონო ტარებისთვის, ყაჩაღობისთვის და ადამიანებისთვის თავისუფლების უკანონო აღკვეთის ბრალდებით წაუყენებენ. ახლა დიდწილად არის მისი ბედი დამოკიდებული იმ მძევლების ჩვენებებზე, რომლებიც შენობაში 4 საათის განმავლობაში იყვნენ.

ადვოკატი ირმა ჭკადუა:

- ამ ადამიანის გულწრფელი პროტესტი რომ მოვისმინე, გადავწყვიტე დამეცვა. წავედი პოლიციაში იმიტომ, რომ მასში დავინახე მართლა გულწრფელობა და პროტესტი იმ საკითხებზე, რომელიც ყველა ჩვენთაგანს გაგვაჩნია. სამწუხაროდ, არც პოზიციიდან და არც ოპოზიციიდან არ ყოფილა მსგავსი დაპირება, რომ ამ პრობლემებს მიხედავდნენ პოლიტიკოსები.

მუდმივად საუბრობენ დასავლეთზე, მაგრამ იქიდან კარგი არაფერი მოაქვთ, თუნდაც საპროცენტო განაკვეთები. ჩვენ ვიცით, რომ საქართველოში არ არსებობს ოჯახი, იმ გამონაკლისების გარდა, რომლებიც ამ გადაწყვეტილებებს უნდა ღებულობდნენ, ბანკის ვალი არ ჰქონდეს. არ არსებობს ოჯახი, რომელსაც არ შეეხო ის უბედურება, რომელსაც ქვია სათამაშო ბიზნესი. ეს ადამიანი დიდი ხანია მსხვერპლია ონლაინ თამაშების, რის გამოც დაკარგა საცხოვრებელი სახლი. ბოლო ავტომანქანა ჰყავს, რომლითაც იყო იქ მისული და ისიც გაყიდული აქვს, ფული აღებული აქვს, ხვალ, კვირას უნდა გადასცეს მყიდველს. იმ მანქანის ფულით გაისტუმრა გარკვეული ვალი, მაგრამ ისევ დარჩა ვალი და ამას განიცდის.

ამბობს, არ მინდა ჩემმა 12 წლის შვილმა გაიაროს იგივე გზა, რა გზაც მე გავიარეო და ამიტომ ითხოვს ამ ონლაინ თამაშების აკრძალვას. ამბობს, მყავს ასევე პენსიონერი დედა, ვხედავ რამდენად მძიმეა ყოველი მისი მისვლა აფთიაქში, რადგან ვერ ავუდივართ წამლების ფასებს და ეს აუცილებელი საჭიროებააო.

ჩვენ ვხედავდით ასევე იმასაც, როდესაც ის მოთხოვნებს აყალიბებდა და ამბობდა ბანკის პროცენტი 7-მდე დავიდესო, რამდენიმე ე.წ. მძევალი ეუბნებოდა ეთქვა, ბევრია და დაეწია 3 პროცენტამდე. ასევე უმრავლესობა ხვდებოდა რომ ე.წ ხელყუმბარა იყო სათამაშო. ეს იყო ერთგვარი პერფორმანსი, რომელსაც მსოფლიოს სხვადასხვა ქვეყნებში მიმართავენ და მან ეს ფორმა აირჩია, მედიის ყურადღება რომ მიეპყრო და თავისი გასაჭირი რომ გაეხმაურებინა. ჩვენ ძალიან კარგად ვიცით, თუ რომელიმე მედიას არ აინტერესებს ის თემა გააშუქოს, არ აშუქებს. ამ ხსნის, ანუ 4 საათის განმავლობაში ელოდებოდა მედიის წარმომადგენლებს, რომ მისი მოთხოვნები გაეშუქებინათ. ამბობდა, შეიკრიბონ პარლამენტარები და ყველამ დააფიქსიროს ამ საკითხებზე თავისი აზრიო, ეს იყო მესიჯი მათთვისაც. ამ სამ მთავარ მოთხოვნას ყველა უჭერს მხარს და არ მეგულება ადამიანი რომ არ აწუხებდეს.

- როგოროც ირკვევა, არ ჰქონდა ხელყუმბარაც...

- ეს არ იყო ხელყუმბარა, ეს იყო სანთებელა, რომელიც იყო ოქროსფერი და მან შეღება მუქად მეტი დამაჯერებლობისთვის.

- იმ მიკროსაფინანსოში ვალი აქვს და იმიტომ მივიდა?

- რატომღაც აქ აღმოვჩნდიო, განსაკუთრებული ნიშნით არ აურჩევია.

- საქმის კვალიფიკაციაზე რას იტყვით?

- ექსპერტიზის დასკვნის შემდეგ იარაღის ნაწილი მოეხსნება, ასევე ყაჩაღობა მოეხსნება, რადგან მას არც ერთი თეთრი არ მოუთხოვია. მეტსაც გეტყვით, როდესაც მოლარე გოგონა გამოვიდა სალაროდან, მას სთხოვა სალაროს კარი დაეკეტა, რომ ვინმეს არ ეფიქრა, რომ რაიმე შემხებლობა ფულთან ჰქონდა. აქედან გამომდინარე მას ასევე მოეხსნება ყაჩაღობა და დარჩება უკანონოდ თავისუფლების აღკვეთა, ესეც არის მძიმე მუხლი, მაგრამ ახლა შევხედოთ რას ამბობენ იქ მყოფი ადამიანები. მათ ჩვენებებზეა დამოკიდებული ყველაფერი. ვნახოთ რა დაგვხვდება საქმეში.

- ხომ არ გასაუბრებიხართ მძევლებს?

- მე რომ ვიყავი პოლიციის განყოფილებაში, მაშინ მიმდინარეობდა ამ მძევლების პარალელურ რეჟიმში დაკითხვა. მერწმუნეთ, თითოეული მათგანი აღნიშნავდა, რომ არავის ცუდად არ მოქცევია, პოზიტიურად იქცეოდა.

- სასამართლოში აღმკვეთზე რა პოზიცია გექნებათ, გირაოს მოითხოვთ?

-მასალების აღების შემდგომ მე შევხვდები ლევანს, მინდა მასთან ერთად გავიარო მასალები. ჩვენ წუხელ გამოვიყენეთ დუმილის უფლება, რადგან მძიმე ფსიქოემოციურ მდგომარეობაში იყო და შემდგომ მივცემთ ჩვენებას. შევჯერდებით აღმკვეთის საკითხზეც. ბევრი ადამიანი დაგვიკავშირდა გუშინ, რომლებმაც შემოგვთავაზეს, რომ ისინი მზად იყვნენ შეეგროვებინათ მისთვის გირაოს თანხა, თუკი გირაოზე იქნებოდა საქმე და ასე დახმარებოდნენ ამ ადამიანს. საზოგადოების მხარდაჭერას ვგრძნობთ. აბსოლუტურად უანგაროდ ვიცავ, რადგან დავინახე, რომ ის იყო გულწრფელი და ყველაფერს გავაკეთებ იმისთვის, რომ მან სრული იურიდიული მომსახურება მიიღოს.

- ვრცელდებოდა ინფორმაცია, რომ ის იყო მთვრალი, ეს დადასტურდა?

- არ იყო ნასვამი, არც არანაირი ნარკოტიკების ზემოქმედების ქვეშ არ იყო. პრაქტიკულად თავი გაწირა თავისი მოთხოვნების ხელისუფლებამდე მისატანად. შეიძლება ბევრს ეს გულწრფელობა მოეჩვენა ნასვამობად, მაგრამ ეს არ დადასტურდა. ეს იყო თავგანწირვა მისი მხრიდან, რადგან მისი სიცოცხლე შეიძლებოდა იქ დასრულებულიყო, მაგრამ ის ამისთვის მზად არის. დასრულდეს ამ ქვეყანაში ეს უსამართლობა, თუნდაც მისი სიცოცხლე ამას შეეწიროს. გააზრებული არ ჰქონდა შედეგი და სასჯელი.

დაკარგა სახლი, ახლა რაც მას აქვს, პრაქტიკულად იმის დაკარგვის წინაშეც დგას და მას ჰყავს მოხუცი დედა რომელიც ქუჩაში რჩებოდა, ამ ყველაფერზე ის ძალიან ნერვიულობდა. სამწუხაროდ ჩვენი ხელისუფლება არაფერს აკეთებს თამაშზე დამოკიდებული ადამიანების დასახმარებლად. ყველა ტელევიზიაში საპატიო ადგილი უკავია სათამაშო ბიზნესის რეკლამას, ეს პრობლემა ერთხელ და სამუდამოდ უნდა მოგვარდეს. პირველ რიგში, ონლაინ თამაშები გასაუქმებელია, ეს ერთმნიშვნელოვნად გასაკეთებელია და ამას ერთი ლევან ზურაბაშვილი კი არ უნდა ითხოვდეს, უნდა ითხოვდეს მთელი საქართველო. ყველა, ვისაც გააჩნია სამართლიანი პროტესტი.