როგორ დაეხმარება მთავრობა სხვადასხვა ბიზნესსა და დასაქმებულებს - "ბიუჯეტს დახმარების პორტფელი 1.1 მილიარდი ლარი დაუჯდება"

მთავრობის გადაწყვეტილებით, შეზღუდვები გარკვეულ ეკონომიკურ საქმიანობას არ შეეხება.

კერძოდ, უწყებათაშორისო საბჭოს გადაწყვეტილებით, შეზღუდვები არ ეხება:

• სახელმწიფო და კერძო სამშენებლო-სარემონტო საქმიანობას;
• საბანკო და საფინანსო საქმიანობას;
• სურსათის, ცხოველების საკვების, აფთიაქების, ვეტაფთიაქის, საყოფაცხოვრებო ქიმიისა და ჰიგიენის მაღაზიების და პრესის ჯიხურების მუშაობას;
• დელივერსა და გატანის სერვისებს;
• სილამაზის სალონებისა და ესთეტიკური მედიცინის ცენტრების მუშაობას;
• ავტოტექმომსახურებისა და ტექნიკური ინსპექტირების სერვისებს;
• საყოფაცხოვრებო ტექნიკის სარემონტო სერვისებს;
• აგრარული ბაზრობის მუშაობას
• არ იზღუდება მსუბუქი ავტომობილით (მათ შორის - ტაქსით) გადაადგილება.

ამასთან, მაღაზიებში, მოლებსა და ბაზრობებზე დასაქმებულები ფინანსურ დახმარებას მიიღებენ, ასევე მათ შეეძლებათ სესხის გადავადება. ამის შესახებ პრემიერმა გიორგი გახარიამ მთავრობის საკოორდინაციო საბჭოს სხდომის დასრულების შემდეგ განაცხადა.

„იქიდან გამომდინარე, რომ ვზღუდავთ რამდენიმე კვირით საცალო ვაჭრობას, ბაზრობებს, მოლებს, მაღაზიებს, ეს შეზღუდვა არის ძირითადად 4-5 კვირა, ვაწესებთ იგივე სახის სოციალურ-მიზნობრივ დახმარებას, რომელიც გვქონდა თვითდასაქმებულებისთვის პირველი ტალღის პერიოდზე. ეს გახლავთ 300 ლარის ოდენობით.

ჩვენ უკვე დაწყებული გვაქვს ამ ხალხის აღრიცხვა იმ კომპანიებთან ერთად, რომლებსაც ყავთ დასაქმებული ეს ადამიანები. ამასთან, ამ 300 ლარის გარდა ჩვენ ვიღებთ იმ ვალდებულებას, რომ ამ სექტორში დასაქმებულ თითოეულ იმ ადამიანს, რომელსაც გააჩნია საბანკო სესხი, მიზნობრივად მივეხმარებით სესხის გადავადებაში,“ - აღნიშნა გახარიამ.

გარდა ამისა, სარესტორნო ბიზნესს, რომელსაც საბანკო სასესხო ვალდებულება გააჩნია, სახელმწიფო საპროცენტო განაკვეთს დაუსუბსიდირებს.

როგორც გიორგი გახარიამ აღნიშნა, დღეისათვის ტურიზმის სექტორთან ერთად ყველაზე მეტად, სწორედ სარესტორნო ბიზნესი დაზარალდა.

„მოგეხსენებათ, დღეს აშკარად გამოჩნდა, რომ ტურიზმის სექტორთან ერთად რესტორნის ბიზნესია ყველაზე დაზარალებული. ამიტომ ის ეფექტური ინსტრუმენტი დახმარების სასტუმროებისთვის, რომელიც ჩვენ გვქონდა - მათი სასესხო ვალდებულებების პროცენტის სუბსიდირება, იგივე პროგრამა დაწესდება და გაგრძელდება რესტონების ბიზნესზეც. ყველა იმ სარესტორნო დაწესებულებას, კომპანიას, რომელსაც გააჩნია საბანკო სასესხო ვალდებულება, სახელმწიფო 6 თვის განმავლობაში დაუსუბსიდირებს საპროცენტო განაკვეთს,“ - განაცხადა გახარიამ.

პრემიერ-მინისტრ განცხადებით, სახელმწიფო ბიუჯეტს ბიზნესისა და მოსახლეობისთვის მიზნობრივი დახმარების პორტფელი, რომელიც დღეს გახდა ცნობილი, 1.1 მილიარდი ლარი დაუჯდება.

როგორც პრემიერმა აღნიშნა, ეს ის მინიმუმია, რისი გაკეთებაც დღეს შესაძლებელია. მისივე თქმით, დღეს გაჟღერებული შეზღუდვების იურიდიული ბაზა შესაბამისი კანონის მოქმედების ვადიდან გამომდინარე, 1-ელ იანვრამდეა.

„დახმარების მეოთხე ტალღის პორტფელი, როგორც მიზნობრივი სოციალური დახმარების, ასევე ბიზნესის დახმარების საერთო ბიუჯეტი სახელმწიფოს დაუჯდება 1 მილიარდ 100 მილიონი ლარი. გვესმის, რომ ესაა ის მინიმუმი, რომლის გაკეთებაც დღეს შეგვიძლია. გარდა ამისა, უნდა გვესმოდეს, რომ ამ შეზღუდვების ფორმალური მხარით გატარების იურიდიული ბაზა 1-ელ იანვრამდე გაგვაჩნია. მოგეხსენებათ, რომ ჯანდაცვის კანონი 1-ელ იანვრამდე მოქმედებს, ისევე როგორც ბიუჯეტია დასამტკიცებელი და დარწმუნებული ვარ, რომ მას შემდეგ, რაც ახალი პარლამენტი შეიკრიბება, ამ ყველაფერს სწრაფად და მარტივად გავაკეთებთ.

ეს იქნება 2 თვიანი გეგმა, რომელმაც შედეგი უნდა მოგვცეს, ქვეყანაში ინფიცირების გავრცელების ტემპი დაასტაბილუროს, რამაც ქვეყანას სწრაფი ეკონომიკური ზრდის ის პოტენციალი უნდა შეუნარჩუნოს, რომელიც გაგვაჩნდა გაზაფხულზე და დღესაც, ყველა საერთაშორისო ორგანიზაცია ადასტურებს, რომ საქართველოს პოტენციალი აქვს სწრაფი პოსტ- კრიზისული ეკონომიკური აღდგენისთვის“, -განაცხადა გიორგი გახარიამ.