"ჩვენი მეგობარი ბიზნესმენი გართულებული მდგომარეობის გამო გადავაფრინეთ უცხოეთში... ძალიან ახლოს მოვიდა კორონა" - სოსო ფხაკაძე

ბიზნესასოციაციის პრეზიდენტი სოსო ფხაკაძე ამბობს, რომ დაწესებული შეზღუდვები ბიზნესს დააზარალებს, თუმცა ეპიდსიტუაციიდან გამომდინარე ეს გადაწყვეტილება უნდა მიღებულიყო.

როგორც მან "ტვ პირველის" ეთერში აღნიშნა, კორონავირუსით მისი მეგობარი, ერთ-ერთი ბიზნესმენი დაინფიცირდა, რომელიც მძიმე მდგომარეობის გამო უცხოეთში გადაიყვანეს.

"ძალიან ახლოს მოვიდა კორონა თითოეულ ჩვენგანთან. მაგალითად, დღეს დილის 7 საათზე, ერთი ჩვენი ძალიან კარგი მეგობარი, კარგი მეოჯახე, კარგი მამა, კარგი ბიზნესმენი, გართულებული მდგომარეობის გამო გადავაფრინეთ უცხოეთში და იმედია კარგად იქნება. ანუ ძალიან გართულებულია ეპიდსიტუაცია.

ძალიან რთულია ასეთ დროს თქვა, რომ მოდით გავავლოთ ხაზი ადამიანის სოცოცხლესა და ეკონომიკას შორის. ეს არის ურთულესი გადაწყვეტილება ბიზნესისთვის. ძალიან დავზარალდებით, მაგრამ როდესაც სასწორზე ადამიანის სიცოცხლე დგას, გადაწყვეტილება ეპიდსიტუაციაზე დაყრდნობით უნდა მიიღო" - აღნიშნა ფხაკაძემ.