აქცია პარლამენტთან - ორი პირი პოლიციისთვის წინააღმდეგობის გაწევის გამო დააკავეს

მთაწმინდა-კრწანისის სამმართველოს უფროსის გოგა მემანიშვილის განცხადებით, პარლამენტთან ორი პირი სამართალდამცველებისთვის წინააღმდეგობის გაწევისთვის დააკავეს. როგორც მან განაცხადა, დაკავებულები საპატრულო პოლიციის დეპარტამენტში გადაიყვანეს.

„ორი პიროვნებაა ადმინისტრაციული წესით დაკავებული, პოლიციელის წინააღმდეგობის გაწევისთვის, 173-ე მუხლით, ორივე დაკავებული გადაყვანილია საპატრულო პოლიციის დეპარტამენტში“,- განაცხადა მემანიშვილმა.

ცნობისთვის, პარლამენტის შენობასთან აქცია იმართება. „ევროპული საქართველოს“ ერთ-ერთი ლიდერის ელენე ხოშტარიას განცხადებით, აქციის მონაწილეები პოლიციამ საბჭოთა სიმბოლიკის დახატვის გამო დააკავა. „ეს იყო აბსოლუტურად ლეგიტიმური პროტესტი „ქართული ოცნების“ მხრიდან ფაქტობრივად, გავრილოვის კიდევ ერთხელ ჩამოყვანის წინააღმდეგ, როდესაც გუშინ რუსებთან ერთად აბაშიძემ დაგმო გავრილოვის ჩამოსვლასთან დაკავშირებული პროტესტი. აქ დროებით კედელზე ვაწერთ „20%“ და საბჭოთა სიმბოლიკას და ამის გამო აკავებენ აქტივისტებს“,- განაცხადა ხოშტარიამ.