ბათუმში ფიტნესკლუბი 10 000 ლარით დააჯარიმეს, მაგრამ მუშაობას მაინც არ აჩერებს - "უსამართლოა, ადამიანს აუკრძალო ვარჯიში"

ბათუმში "რეფორმერ ფიტნესი" მთავრობის გადაწყვეტილებას არ ემორჩილება და მუშაობას აგრძელებს. "რეფორმერ ფიტნესის" მფლობელს გიორგი ფუტკარაძეს Ambebi.ge გაესაუბრა, რომელმაც განაცხადა, რომ მთავრობამ პანდემიის პირობებში უსამართლო გადაწყვეტილება მიიღო და კერძო ბიზნესის წარმომადგენლები შემოსავლი გარეშე დატოვა.

როგორც იგი გვიყვება, პოლიციამ დღეს წესების დაუმორჩილებლობის გამო 10 000 ლარით დააჯარიმა, თუმცა ჯარიმის გადახდას და მუშაობის შეწყვეტას არ აპირებს.

"უსამართლოა, ადამიანს აუკრძალო ვარჯიში, მუშაობა და ჯანსაღი ცხოვრების წესი... ადამიანებს თავისუფალი ცხოვრების საშუალება უნდა ჰქონდეს და თავად უნდა განსაზღვრონ რისკი. ჩვენ ფუნქციონირებას ვაგრძელებთ და არ ვწყვეტთ მუშაობას, ამასთან არ ვაპირებთ ჯარიმის გადახდას.

ვფიქრობთ, რომ ყველა დაწესებულებამ უნდა იმუშაოს, რადგან ადამიანებს შემოსავალი ჰქონდეთ. ნებისმიერი ბიზნესი თავისუფალი უნდა იყოს. ჩვენთან იდეალური ჰიგიენური ნორმებია, თავად ნახავთ - ამაში არ გარწმუნებთ.

სივრცე ძალიან დიდია, შეზღუდული დროა, სამწუხაროდ... კორონავირუსი შეიძლება ვიღაცას დაემართოს, ვიღაცას - არა. ჩვენთვის ეს არის შემოსავლის წყარო და არ ვემორჩილებით მთავრობის გადაწყვეტილებას, მოქალაქეები მოდიან და ჩვენი ცენტრით სარგებლობენ, ჯანსაღი ცხოვრებით არიან დაჯავებული",- აცხადებს გიორგი ფუტკარაძე.