"თუ გინდათ მოლაპარაკება ჩაიშალოს, გაუშვით ირაკლი კობახიძე - ის ზუსტად იმის საწინააღმდეგოს აკეთებს, რაც მომლაპარაკებელმა უნდა გააკეთოს" - ხმალაძე

თუ გინდათ მოლაპარაკება ჩაიშალოს და შეთანხმება არ შედგეს, გაუშვით მოლაპარაკებებზე ირაკლი კობახიძე! - კობახიძე ზუსტად იმის საწინააღმდეგოს აკეთებს, რაც მომლაპარაკებელმა უნდა გააკეთოს, - აღნიშნული შეფასება “პალიტრანიუსის“ გადაცემა “დღის ნიუსრუმში“ კონსტიტუციონალისტმა ვახტანგ ხმალაძემ გააკეთა.

მისი თქმით, მომლაპარაკებელი არ უნდა იმუქრებოდეს, შეურაცხყოფას არ აყენებდეს და უნდა არჩევდეს არაგამაღიზიანებელ ლექსიკას.

“ერთი და იგივე აზრის გამოთქმა შეიძლება შეურაცხმყოფელი სიტყვებითაც და ნეიტრალური ლექსიკითაც. რაც ირაკლი კობახიძის პოლიტიკურ სცენაზე გამოსვლის შემდეგ მახსოვს, როგორც წესი, ის თავისი ხისტი პოზიციებით, ხისტი ლექსიკით გამოირჩეოდა. გავიხსნოთ მისი პარლამენტის თავმჯდომარეობის პერიოდი, როდესაც ის პრივილეგიას პარლამენტის თავმჯდომარის ადგილიდან ნებისმიერ დროს ბოროტად იყენებდა. არა ერთი ისეთი ნათქვამი მახსენდება, რომელიც პარლამენტის თავჯდომარემ არ უნდა იკადროს, რადგან პარლამენტის თავმჯდომარე არის ყველას თავმჯდომარე - უმრავლესობისაც და ოპოზიციისაც“, - განაცხადა ვახტანგ ხმალაძემ.