როგორია ეპიდვითარება საქართველოს სამეზობლოში - რუსეთის, აზერბაიჯანისა და სომხეთის მონაცემები

რუსეთში ბოლო 24 საათის განმავლობაში კოვიდ-19-ის 28 137 ახალი შემთხვევა დაფიქსირდა და ინფიცირებულთა საერთო რაოდენობამ 2 625 848-ს მიაღწია, - ამის შესახებ ინფორმაციას ადგილობრივი მედია ავრცელებს.

ამასთან, ბოლო დღე-ღამის განმავლობაში ქვეყანაში ვირუსით კიდევ 560 პაციენტი დაიღუპა და დაღუპულთა რიცხვი 46 453-მდე გაიზარდა. რუსეთში კორონავირუსისგან 2 085 958 ადამიანი გამოჯანმრთელდა.

კორონავირუსის შემთხვევების რაოდენობით რუსეთი აშშ-ს, ინდოეთისა და ბრაზილიის შემდეგ მეოთხე ადგილზეა მსოფლიოში.

აზერბაიჯანში კი გასული დღე-ღამის განმავლობაში კორონავირუსის 4 268 ახალი შემთხვევა გამოვლინდა და დაინფიცირებულთა საერთო რიცხვი 171 423-მდე გაიზარდა. ინფორმაციას ადგილობრივი მედია მინისტრთა კაბინეტთან არსებულ ოპერატიულ შტაბზე დაყრდნობით ავრცელებს.

გარდა ამისა, ბოლო დღე-ღამეში კოვიდ19-ით სიკვდილიანობის 43 ახალი ფაქტი დაფიქსირდა და დაღუპულთა რიცხვმა 1 883-ს მიაღწია.

ვირუსისგან გამოჯანმრთელდა 107 635 პაციენტი. ამჟამად აქტიური შემთხვევების რიცხვი 62 000-ს აღწევს.

რაც შეეხება სომხეთს, სომხეთში კორონავირუსის 995 ახალი შემთხვევა გამოვლინდა და საერთო ჯამში, ქვეყანაში კორონავირუსით ინფიცირებულთა რიცხვი 147 312-მდე გაიზარდა, - ინფორმაციას ადგილობრივი მედია ქვეყნის ჯანდაცვის უწყებაზე დაყრდნობით ავრცელებს.

მათივე ინფორმაციით, სომხეთში კოვიდ 19-ს კიდევ 17 ადამიანი ემსხვერპლა. პანდემიის დაწყების დროიდან დღემდე დაღუპულთა საერთო რაოდენობა კი 2 462-ს შეადგენს.

ქვეყანაში ვირუსისგან 124 521 პაციენტი გამოჯანმრთელდა.