"საკუთარ თავზე მაქვს გამოცდილი სიღარიბე, მაგრამ მშობლები მასწავლიდნენ, რომ რაც არ უნდა გამიჭირდეს, არ უნდა დავიტაცო" - კახა კალაძე

თბილისის მერის კახა კალაძის თქმით, ქვეყანაში არსებული მძიმე ეკონომიკური და ეპიდემიოლოგიური სიტუაცია არ იძლევა იმის საფუძველს, რომ "ყველანაირი უკანონობა დაშვებული იყოს".

ამის შესახებ მან "ღამის კურიერის" ეთერში განაცხადა, სადაც კიდევ ერთხელ გამოეხმაურა აფრიკის დასახლებაში მიმდინარე დემონტაჟს.

"მძიმე ეპიდემიოლოგიური და სოციალური მდგომარეობა გვაქვს, მაგრამ ეს არ ნიშნავს, რომ ყველანაირი უკანონობა დაშვებული იყო. ეს მიდგომა მიუღებელია. რას ვეუბნებით იმ ადამიანებს, ვისაც 500 ლარის მითვისებაზე კანონის სრული სიმკაცრით ვსჯით? აბა როგორ გაგვეკეთებინა? მიგვეშა მშენებლობები და მერე გამოგვეყარა?

ჩემთვის ძალიან პრინციპულია სამართლიანობა. მე ყველანაირი პერიოდი მაქვს გამოვლილი, საკუთარ თავზე მაქვს გამოცდილი სიღარიბეც, რთული პერიოდიც, მაგრამ გავიზარდე ისე, რომ ჩემი მშობლები ყოველთვის მეუბნებოდნენ და მასწავლიდნენ, რომ რაც არ უნდა გამიჭირდეს ცხოვრებაში, არასდროს უნდა შევხედო წარმატებულ ადამიანს ცუდი თვალით, არ უნდა შემეხარბოს მისი, არასდროს უნდა მოვიპარო, არ უნდა დავიტაცო.

შესაბამისად, ეს კონკრეტული შემთხვევები, ეს ხომ ჩემი საკუთარი მიწები არ არის? ეს ხომ ჩვენი ქვეყნის, თითოეული თქვენგანის ქონება არის და როდესაც ხდება მიწების დატაცება, როდესაც ხდება უკანონო შენობა-ნაგებობების განთავსება, ეს მიდგომა და დამოკიდებულება კატეგორიულად მიუღებელია..." - აღნიშნა კახა კალაძემ.

ცნობისათვის, აფრიკის დასახლებაში, თბილისის მერიამ მშენებლობების დემონტაჟი დაიწყო, რასაც სამართალდამცავებსა და მოსახლეობას შორის დაპირისპირება მოჰყვა. ამ დროისთვის მომხადარი დაპირისპირების შედეგად 8 ადამიანია დაკავებული.