აშშ-ში Moderna-ს ვაქცინის საგანგებოდ გამოყენების რეკომენდაცია გასცეს - რა უპირატესობა აქვს მას Pfizer/BioNTech-ის ვაქცინასთან შედარებით

აშშ-ის საკვებისა და წამლების ადმინისტრაციის მრჩეველთა მოწვეულმა კომიტეტმა Moderna-ს ვაქცინის საგანგებოდ გამოყენების რეკომენდაცია გასცა, - ამის შესახებ ინფორმაციას Reuters-ი ავრცელებს.

სააგენტოს ცნობით, ვაქცინის გამოყენების მიზანშეწონილობას კომიტეტის 20-მა წევრმა დაუჭირა მხარი, წინააღმდეგი არავინ აღმოჩნდა, ერთმა კი - ხმის მიცემისგან თავი შეიკავა.

აშშ-ის საკვებისა და წამლების ადმინისტრაცია Moderna-ს ვაქცინის საგანგებოდ გამოყენებას, სავარაუდოდ, დღეს დაამტკიცებს და როგორც კი ეს მოხდება, აშშ-ში აღნიშნული ვაქცინის განაწილება დაიწყება.

Pfizer/BioNTech-ის ვაქცინისგან განსხვავებით, Moderna-ს ვაქცინა არ საჭიროებს სპეციალურ ულტრა ცივ საყინულეებს ან დიდი რაოდენობით მშრალ ყინულს, რაც მის შორ მანძილზე ტრანსპორტირებას ამარტივებს.

აშშ-ში წლის ბოლომდე Pfizer/BioNTech-ისა და Moderna-ს ვაქცინების 40 მილიონ დოზას ელოდებიან, რაც 20 მილიონი ადამიანის ვაქცინაციისთვისაა საკმარისი. კლინიკური ცდების დროს ორივე ვაქცინამ კორონავირუსისგან დაცვის კუთხით დაახლოებით 95%-იანი ეფექტურობა აჩვენა.

ცნობისათვის, მრჩეველთა იგივე კომიტეტმა გასულ კვირას Pfizer/BioNTech-ის ვაქცინის საგანგებო გამოყენებას დაუჭირა მხარი. მომდევნო დღეს კი აშშ-ის საკვებისა და წამლების ადმინისტრაციამ შესაბამისი ავტორიზაცია გასცა, რასაც ამერიკაში ორშაბათიდან ვაქცინაციის პროგრამის დაწყება მოჰყვა.