„თბილღვინოს“ საფერავი ლონდონში International Wine Challenge-ის საუკეთესო წითელ ღვინოდ დასახელდა

საერთაშორისო ბაზარზე ქართული ღვინის აღიარება გრძელდება. ამჯერად, ლონდონში International Wine Challenge-ის საერთაშორისო კონკურსზე ქართულმა ღვინომ პირველად მოიპოვა უმაღლესი ჯილდო, „თბილღვინოს“ საფერავი წლის საუკეთესო ღვინოდ დასახელდა.

ამავე კონკურსზე 95 ქულით, ოქროს მედალი აიღო ღვინომ "მუკუზანი განსაკუთრებული მარაგი" ხოლო Decanter, London 2020 ზე, ოქროს მედალი 95 ქულით„ მუკუზანმა“ მოიპოვა.

კომპანია „თბილღვინო“ უკვე წლებია, ქართული ღვინის დაყენების უძველეს ტრადიციასა და ქართული ვაზის უნიკალურ ჯიშებს მსოფლიოს აცნობს. კომპანია იყენებს ღვინის წარმოების ტრადიციულ და უმაღლეს სტანდარტებთან შესაბამის მეთოდებს.

წელს, „თბილღვინომ“ კონკურსებში მონაწილეობის შედეგად 31 ჯილდო მიიღო. ამისათვის, კომპანია დიდი ხნის განმავლობაში ემზადებოდა, წლიდან წლამდე ზრუნავდა ხარისხის გაუმჯობესებასა და წარმოების პროცესის მეტად სრულყოფაზე.

საქართველოსთვის ღვინო სავიზიტო ბარათი გახდა, განსაკუთრებით მას შემდეგ, რაც მსოფლიომ შეიტყო, რომ სწორედ ჩვენი ქვეყანა ითვლის ღვინის წარმოების 8000-წლიან ისტორიას. საერთაშორისო კონკურსებში გამარჯვების შემდეგ კი ღვინის წარმოების ისტორიული ტრადიცია და ქვეყნის შესახებ ინფორმაცია უფრო ფართო აუდიტორიისთვის ხდება ცნობილი.

„თბილღვინოს“ წარმატების შემდეგ, ქართული ღვინისა და კომპანიის შესახებ სტატიები გამოჩნდა უცხოურ მედიაში. „10 რამ, რაც International Wine Challenge-ის ტოპ წითელი ღვინის შესახებ უნდა იცოდეთ“ - ამ სათაურით გამოაქვეყნა სტატია ლონდონში გამართული კონკურსის ოფიციალურმა ვებ-გვერდმა. პუბლიკაციაში მოთხრობილია კომპანიის ისტორია 1962 წლიდან დღემდე, საბჭოთა კავშირის პირობებში და მისი დაშლის შემდეგ.

„გამარჯვებული საფერავი „თანამედროვე“, „ახალგაზრდა“ სტილს განეკუთვნება. მან 100 ქულიდან 97 დააგროვა და ერთადერთი წითელი ღვინოა (ასევე, ოთხ სხვადასხვა სახეობის ღვინოს შორის ერთ-ერთი), რომელმაც 2020 წლის კონკურსში აღნიშნული შედეგი მიიღო“, - წერს ვებ-გვერდი.

საუკეთესო ღვინის მწარმოებლების შესახებ სტატია Hospitality Magazine-მაც მოამზადა, რომელშიც ჩვენი ქვეყანა პორტუგალიასთან, ავსტრალიასთან, საფრანგეთთან და ღვინით ცნობილ სხვა ქვეყნებთან ერთად, საპატიო ადგილს იკავებს.

„თბილღვინოს“ მიერ ქართული ღვინისა და ვაზის კულტურის პოპულარიზაცია ამით არ მთავრდება. კომპანია შემოქმედებით გუნდთან ერთად ნახევარი წლის განმავლობაში მუშაობდა ანიმაციაზე, რომელშიც ისტორიულ ფაქტებსა და მითებზე დაყრდნობით არის მოთხრობილი ქართული ღვინის 8000-წლიანი ისტორია. მის კრეატიულ კონცეფციაზე სააგენტო Hans&Gruber-მა იმუშავა, პერსონაჟები და პეიზაჟები კი Hans&Gruber-ის კრეატიული დირექტორის, გიორგი მაღრაძე Artman-ის მიერ შეიქმნა, ანიმაციის გაცოცხლებაზე კი სტუდია Animatory-მ იმუშავა. მუსიკალური კომპოზიცია ანიმაციისთვის Postred-მა შექმნა. ანიმაცია ქართული აუდიტორიისთვის საკმაოდ ემოციური აღმოჩნდა. მასში ასახულია ჩვენი ქვეყნის ისტორია, რომელსაც თან სდევს ვაზის პატივისცემისა და ღვინის დაყენების მუდმივად განვითარებადი ტრადიცია.

ანიმაციის შექმნის მიზანი მხოლოდ ისტორიის წარმოჩენა არ ყოფილა. „თბილღვინოს“ სურდა, ღვინის მიერ გავლილი გზის ჩვენებით მომავალ თაობასთან ხიდი შეექმნა. 8000-წლიანი ისტორია კიდევ უფრო დიდ მოტივაციას იძლევა, ქვეყანაში ღვინის წარმოება მუდმივად განვითარდეს.

ქართული ღვინის მწარმოებელი კომპანია „თბილღვინო“ 1962 წელს დაარსდა და ერთ-ერთი უმსხვილესი საწარმო გახდა. 1999 წლიდან კომპანიის სათავეში ძმები ზურაბ და გიორგი მარგველაშვილები არიან. მათ ღვინის წარმოება ახალ ეტაპზე გადაიყვანეს, დანერგეს ხარისხის ახალ სტანდარტები, რომელიც ემსახურებოდა ტრადიციების შენარჩუნებასა და ამავდროულად, სიახლეების შემოტანას.

დღეს, „თბილღვინო“ 30 ქვეყანაშია წარმოდგენილი. კომპანია კახეთის რეგიონში 306 ჰექტარ ფართობზე გაშენებულ ვენახებს ფლობს და უძველესი ქართული ვაზის ჯიშების შენარჩუნებასა და პოპულარიზაციას უწყობს ხელს.

R