ავტორი:

"თომას და მეუღლესთან დაშორებული იყო, აქ ჩამოაკითხა... ეტყობა ამოუყვანა ყელში და ტრაგედია დატრიალდა" - რას ჰყვებიან ადგილობრივები თელავის მკვლელობაზე?

"თომას და მეუღლესთან დაშორებული იყო, აქ ჩამოაკითხა... ეტყობა ამოუყვანა ყელში და ტრაგედია დატრიალდა" - რას ჰყვებიან ადგილობრივები თელავის მკვლელობაზე?

38 წლის მამაკაცი, ზურაბ ბენაშვილი თელავის რაიონის სოფელ ფშაველში ცოლისძმამ, 24 წლის თომა ბაბისაშვილმა სანადირო თოფიდან გასროლით მოკლა. გასროლის ხმა დილის საათებში მეზობლებმა გაიგეს და წივილ-კივილზე ქუჩაში გასულებს მამაკაცი უკვე გარდაცვლილი დახვდათ, მას სიცოცხლის ნიშანწყალი არ ეტყობოდა. მოკლულს თოფით ჭრილობა თავის არეში აქვს მიყენებული.

დანაშაულში ბრალდებულს შემთხვევის ადგილიდან გაქცევა არ უცდია, ის სამართალდამცავებმა მალევე დააკავეს, ნივთმტკიცებად ამოღებულია დანაშაულის ჩადენის იარაღი - სანადირო თოფი. საქმე 108-ე, განზრახ მკვლელობის მუხლით აღიძრა, რაც 7-დან 15 წლამდე ვადით თავისუფლების აღკვეთას ითვალისწინებს. შემთხვევის ადგილზე სამართალდამცავები დიდხანს მუშაობდნენ. შემდეგ ცხედარი პროზექტურაში გადაასვენეს.

ერთი ვერსიით, მამაკაცი მეუღლესთან გაშორებული იყო და სოფელში მასთან შესარიგებლად ჩავიდა. ცოლი არ მიყვებოდა და ამიტომ მოხდა კონფლიქტი. მეორე ვერსიით, სიძესა და ცოლისძმას შორის არსებულ დაპირისპირებას მოყვა მკვლელობა. კონკრეტულად, რა ვერსიაზე მუშაობს გამოძიება, ეს ჯერჯერობით უცნობია.

უცნობია ისიც, თუ რა ჩვენება მისცა გამოძიებას თავად ბრალდებულმა. ჩვენი ინფორმაციით, დაკავებული დანაშაულს აღიარებს. ადგილობრივებს მომხდარის დეტალებზე საუბარი უჭირთ. ამბობენ, რომ არ იციან, რა კონფლიქტი იყო სიძე-ცოლისძმას შორის. კიდევ ერთი ვერსიით, სიძე-ცოლისძმას უთანხმოება წარსულშიც ჰქონდათ. თუმცა არ საუბრობენ კონკრეტულად რატომ იყო მათ შორის უთანხმოება.

"თომას უსვრია სიძისთვის, რა შელაპარაკება მოუხდათ, არ ვიცით. რუსთავში იყო ეს გოგო გათხოვილი, გაყრილები იყვნენ და კარგა ხანია აქ ბებიასთან იყო ჩამოსული, ეტყობა ქმარმა ჩამოაკითხა. გასროლის ხმაზე გამოვედი გარეთ, უკვე ხალხი იყო მოგროვილი, მათ სახლთან ახლოს, ქუჩაში ეგდო მოკლული. ყვირილი და წივილი ისმოდა, ახლოს არ მივსულვარ. თომა ძალიან კარგი ახალგაზრდაა და ეს რატომ ჩაიდინა, არ ვიცით" - ამბობს მათი მეზობელი.

შინაგან საქმეთა სამინისტრომ ოფიციალურად დაადასტურა თომა ბაბისაშვილის დაკავების ფაქტი. უწყების ცნობით, გამოძიებით დადგინდა, რომ თ.ბ.-მ, წარსულში არსებული უთანხმოების გამო, მის დასთან არარეგისტრირებულ ქორწინებაში მყოფ, 1982 წელს დაბადებულ ზ.ბ.-ს სანადირო თოფიდან გასროლით სასიკვდილო ჭრილობები მიაყენა. თუმცა არც შს სამინისტროში საუბრობენ რა უთანხმოებაზეა საუბარი. ცალსახაა ტრაგედიას წინ უძღოდა ურთიერთშელაპარაკება.

ბესიკი ჩაველაშვილი, ადგილობრივი:

- თომა ბაბისაშვილმა ესროლა მოკლულს, მიზეზის შესახებ მართლა არაფერი ვიცით. ჯერ ითქვა, რომ ყოფილი სიძე მოკლა, მერე ითქვა, რომ დის მეორე ქმარი იყოო. რატომ მოუხდათ კონფლიქტი, არ ვიცით. სოფელში არავინ არაფერი იცის. მოკლული მამაკაცი არის რუსთავიდან, თომას დებიც რუსთავში იზრდებოდნენ, ესეც ახლა გავიგე, თორემ ისიც არ ვიცოდი თომას დები რომ ჰყავდა. თომაც რუსთავში გაიზარდა, მამამისს ყავდა პირველი მეუღლე იქ და იქ გადავიდნენ ბავშვები საცხოვრებლად. სკოლის დამთავრების შემდეგ თომა მობრუნდა სოფელში და აქ ბებიასთან და ბიძასთან ერთად ცხოვრობდა. თომა არ არის ცუდი ბიჭი, ნორმალური ბიჭია, მასზე ცუდი არაფერი გამიგია, რომ ვინმესთან კონფლიქტი და ჩხუბი მოსვლოდა.

ზრდილობიანი ბიჭია, მაგრამ დღეს რა მოხდა და რატომ ესროლა თოფი, არ ვიცი. არც ის ვიცი, ეს თოფი როგორ აღმოჩნდა მის ხელში. შეიძლება სანადირო თოფი ბიძამისის იყოს. თომას ბიძა არის მწყემსი და სულ მთაშია და მწყემსავს საქონელს და ცხვარს. ბებიის ოჯახში ცხოვრობდა თომა ბიძასთან და ბებოსთან ერთად, მამამისი სხვაგან ცხოვრობს, სხვა ცოლ-შვილთან. თომაზე ცუდს ამ სოფელში ალბათ არავინ გეტყვით. მე დადებითად ვახასიათებ, როგორც უკონფლიქტო პიროვნებას და ამიტომ რაც მოხდა ეს ჩემთვის გასაკვირია. გამოძიება დაადგენს მიზეზებს.

თამარი, ადგილობრივი:

- გავიგე, რომ თომას მოუკლავს, მაგრამ მიზეზი არ ვიცი. თვითონ ბაბისაშვილებს კარგი ოჯახი აქვთ. თომა კარგი ბიჭია. მოკლულს არ ვიცნობ, დასაც არ ვიცნობ, კარგი ახალგაზრდა ბიჭია, წესიერი, ეტყობა ძალიან ამოუყვანა ყელში და იმიტომ დატრიალდა ეს ტრაგედია. საქმეზე გამოძიება გრძელდება. დაკავებულს ბრალს სავარაუდოდ ხვალ წაუყენებენ და სასამართლო იმსჯელებს მისთვის პატიმრობის შეფარდების საკითხზე. რა ჩვენება მისცა ბრალდებულის დამ და ბებიამ გამოძიებას, ეს და სხვა დეტალები მოგვიანებით გახდება ცნობილი.

მთავარ ფოტოზე: მკვლელობაში ბრალდებული თომა ბაბისაშვილი