"ის, რაც ბევრ ადამიანს ამ წელს შობისთვის სურს, უბრალოდ ჩახუტება ან ხელის ჩაჭიდებაა" - ელისაბედ მეორეს სადღესასწაულო მიმართვა

თუნდაც ყველაზე ბნელ ღამეებში არის იმედი განთიადისა, - ამის შესახებ ბრიტანეთის დედოფალმა, ელისაბედ მეორემ ყოველწლიურ სადღესასწაულო მიმართვაში განაცხადა.

დედოფალმა ყურადღება პანდემიაზე და მისგან შექმნილ გამოწვევებზე გაამახვილა და აღნიშნა, რომ არსებული მდგომარეობის გამო, ის, რაც ადამიანებს წლევანდელი შობის დღესასწაულზე ყველაზე მეტად სურთ, ერთმანეთთან სიახლოვეა.

"რასაკვირველია ბევრისთვის შობის დღესასწაული სევდით იქნება შეფერილი - ზოგი დაკარგულ ძვირფას ადამიანებს გლოვობს, ზოგს მეგობრები და ოჯახის წევრები ენატრება, რომლებთანაც, უსაფრთხოების გამო, განცალკევებით უწევს ყოფნა. თუ თქვენ მათ შორის ხართ, იცოდეთ, რომ თქვენ მარტო არ ხართ. ის, რაც ბევრ ადამიანს ამ წელს შობისთვის სურს, უბრალოდ ჩახუტება ან ხელის ჩაჭიდებაა, მაგრამ თუნდაც ყველაზე ბნელ ღამეებში არის იმედი განთიადისა,“- აღნიშნა დედოფალმა.

მისივე თქმით, მიუხედავად იმისა, რომ პანდემიამ ადამიანები დააშორა, ამავდროულად, ბევრი მიმართულებით დააახლოვა კიდეც.

„აღსანიშნავია, რომ წელმა, რომელმაც ერთმანეთს დაგვაშორა, მრავალმხრივ დაგვაახლოვა კიდეც. დიდ ბრიტანეთსა და მთელ მსოფლიოში ადამიანები ამ წლის გამოწვევებს შესანიშნავად გაუმკლავდნენ და მე ამაყი ვარ ამ შეუპოვარი სულისკვეთებით“, – განაცხადა ბრიტანეთის დედოფალმა.