ბოლოდროინდელ კიბერთავდასხმებში ეჭვმიტანილი რუსეთია - რა წერია აშშ-ის სპეცსამსახურების ერთობლივ განცხადებაში

აშშ-ის დაზვერვის სამსახურებში აცხადებენ, რომ მათ სჯერათ, ბოლოდროინდელი კიბერთავდასხმების მიღმა რუსეთი დგას. ამის შესახებ BBC წერს. აქამდე პრეზიდენტ ტრამპს ჰქონდა ეჭვი, რომ ყოველივეს მიღმა ჩინეთი იდგა, პრეზიდენტის ადმინისტრაციის ზოგიერთი წევრი კი რუსეთს ადანაშაულებდა.

ახლა კი, აშშ-ის დაზვრევის სამსახურები ავრცელებენ ერთობლივ განცხადებას, სადაც აღნიშნულია, რომ შტატების 10-ზე მეტმა სახელმწიფო სტრუქტურამ განიცადა ამ კიბერშეტევის გავლენა. მათივე განცხადებით, სამუშაოები კვლავ მიმდინარეობს ინციდენტის მასშტაბების გასაგებად, რომელიც მიზნად ისახავდა სხვადასხვა სამსახურების მონაცემების შეგროვებას, უფრო კონკრეტულად კი, მიზანი დაზვერვის სამსახურების მიერ შეგროვებული ინფორმაციის მოპოვება იყო.

“ამ დროისთვის ჩატარებული სამუშაოები მიუთითებენ, რომ კიბერშეტევის უკან, სავარაუდოდ, რუსეთი დგას", - ნათქვამია აშშ-ის ეროვნული დაზვერვის დირექტორის აპარატის, გამოძიების ფედერალური ბიუროს, შტატების ინფრასტრუქტურისა და კიბერუსაფრთხოების უზრუნველყოფის სააგენტოს ერთობლივ განცხადებაში.

ცნობისთვის, დეკემბერში ცნობილი გახდა, რომ კიბერშეტევა განხორციელდა აშშ-ის ფინანსთა სამინისტროსა და ტელეკომუნიკაციებისა და ინფორმაციის ეროვნული სამმართველოს სისტემებზე, თუმცა ჰაკერული თავდასხმა 2020 წლის გაზაფხულზე მოხდა, რა დროსაც ჰაკერებმა წვდომა მიიღეს სახელმწიფო უწყებების ელექტრონულ ფოსტებზე.

წყარო: BBC.com