"მთავარი არხის" ჟურნალისტმა ნინო ანანიაშვილის პუანტები ნაგავში გადაყარა - როგორ შეაფასა ფაქტი ნიკა გვარამიამ?

ნინო ანანიაშვილის ნოვოსიბირსკის თეატრის ხელმძღვანელად დანიშვნის შემდეგ, საზოგადოების დიდი ნაწილი პრიმა ბალერინას მიმართ უარყოფითად განეწყო. მის მიმართ მძიმე შეფასებები არ დაიშურეს "ნაციონალური მოძრაობის" ერთგულმა მხარდამჭერებმაც.

გუშინ "მთავარი არხის ჟურნალისტმა" მაიკო ლომიძემ სოციალური ქსელში ერთგვარი აქცია-პერფორმანსი გამოაქვეყნა, სადაც ვხედავთ, რომ ჟურნალისტი რამდენიმე წლის წინ აუქციონზე შეძენილ ნინო ანანიაშვილის პუანტებს ნაგავში ყრის.

"რამდენიმე წლის წინ ჩემმა მეგობრებმა საქველმოქმედო აუქციონი მოაწყვეს. ნინო ანანიაშვილს ვთხოვეთ, რაიმე ნივთი შემოეწირა. მართლაც გადმოგვცა თავისი პუანტები, რომელშიც 1998წ უცეკვია.

ერთი ბიჭი გამომყვა კაი ხანს ვაჭრობაში, მაგრამ არ დავუთმე და ყველაზე ძვირფასი ლოტი მე დამრჩა. მას შემდეგ კარადაში ვინახავდი, მათ გამოსაფენად შესაბამისი თარო, ნიშა, დისპლეი აქამდე ვერ მოვიფიქრე. ახლა მივხვდი, სადაა მათი ადგილიო, როგორ დამენანა!

პუანტებიც, ცხადია, მაგრამ უფრო მეტად ბრწყინვალე კარიერის ასეთი სამარცხვინო დასასრული. რუსეთი ოკუპანტია!ყველა კოლაბორაციონისტი - ნონ გრატა!ხოლო ზოგიერთი - PRIMA NON GRATAE!" - წერს ლომიძე ვიდეოს კომენტირებისას.

არხის დირექტორმა ნიკა გვარამიამ ჟურნალისტის ამ ნაბიჯს კინო უწოდა, იქვე დასძინა, რომ მაიკო ლომიძე აქამდე ასეთი გაბრაზებული არ უნახავს. ვიდეოს უამრავი ადამიანი გამოეხმაურა:

ნიკა გვარამია: გინახავთ ასეთი კინო? ასეთი გულნატკენი და თან გაბრაზებული (რაც სტრიქონებსშორისაც და კადრებს შორისაც იკითხება), მე ჯერ არ მინახიხარ

თამარ ბაღაშვილი: ყველაზე მძიმე განაჩენი ადამიანმა ალბათ მხოლოდ საკუთარ თავს შეიძლება გამოუტანოს. რა სამწუხარო სანახავია, ნაგავში გადაგდებული ბრილიანტი

ნათია გოგსაძე: უმძიმესი განაჩენია მისთვის, ეს რატომ გააკეთა

მანანა მანჯგალაძე: რა ძნელი ყოფილა ამ პოსტის " დალაიქება", რა სამწუხაროა, დაჯერებაც მიჭირს.მერე ალბათ იტყვიან საქართველოში ვერ გამიგესო,ჩემმა ხალხმა ზურგი მაქციაო. არადა სულ პირიქით

დავით ერაძე: სიუჟეტივით პოსტია მაიკო... ალალი და გულდაწყვეტილი