Moderna-ს მტკიცებით, მათი ვაქცინა მინიმუმ 1-წლიან იმუნიტეტს ქმნის - როგორი შეთანხმება აქვს კომპანიას მსოფლიოს ქვეყნებთან

Moderna-ს კორონავირუსის საწინააღმდეგო ვაქცინა ორგანიზმში იმუნიტეტს მინიმუმ 1 წლით ქმნის, - Reuters-ის ინფორმაციით, ამის შესახებ კომპანიამ „მორგანის ჯანდაცვის“ კონფერენციაზე განაცხადა.

ამასთან, ფარმაცევტული კომპანია ირწმუნება, რომ მის მიერ გამოყენებული RNA (mRNA) ტექნოლოგია ეფექტურად მოქმედებს კორონავირუსის ახალი ვარიანტის წინააღმდეგაც, რომელიც მთელ რიგ ქვეყნებში გაჩნდა.

კომპანიის ინფორმაციით, 2021 წელს 600 მილიონიდან 1 მილიარდამდე ვაქცინის დოზის მიწოდებას გეგმავს. სხვადასხვა ქვეყნის მთავრობასთან წინასწარ გაფორმებული ნასყიდობის ხელშეკრულებების შეფასების საფუძველზე კი წელიწადში 11.7 მილიარდი აშშ დოლარის ღირებულების ვაქცინის გაყიდვას პროგნოზირებს.

Moderna-ს ვაქცინა mRNA-1273 კორონავირუსის იმიტაციისთვის სინთეზურ mRNA- ს იყენებს და იმუნურ სისტემას მის ამოცნობასა და განეიტრალებას ასწავლის.