თბილისში მუნიციპალური ტრანსპორტის მოძრაობა პირველ მარტამდე არ აღდგება

თბილისი ერთ-ერთი ბოლოა იმ დიდ ქალაქებს შორის, სადაც კორონავირუსთან დაკავშირებული შეზღუდვების ფარგლებში, საზოგადოებრივი ტრანსპორტის მოძრაობა აღდგება. დედაქალაქში, ისევე როგორც ქუთაისსა და რუსთავში სკოლების და მუნიციპალური ტრანსპორტის მუშაობის განახლება დაგეგმილია 1-ლი მარტისთვის, თუმცა, გადაწყვეტილება ეპიდემიოლოგიური ვითარებიდან გამომდინარე იქნება მიღებული.

რაც შეეხება სხვა დიდ ქალაქებს - ბათუმში, ზუგდიდში, გორში, ფოთსა და თელავში პირველი თებერვლიდან აღდგება მუნიციპალური ტრანსპორტის მოძრაობა.

ამ ქალაქებთან შედარებით, თბილისში ასევე ერთი თვის დაგვიანებით - მარტიდან გაიხსნება სკოლებიც. საბავშვო ბაღების მუშაობის აღდგენა, ასევე პროფესიულ და უმაღლეს სასწავლო დაწესებულებებში სტუდენტების აუდიტორიებში დაბრუნება დაგეგმილია 1-ლი მარტიდან.

ამასთან, მთავრობის ადმინისტრაციის გადაწყვეტილებით, 1-ელ მარტამდე ქვეყნის მასშტაბით ძალაში რჩება გადაადგილებაზე არსებული შეზღუდვა 21:00 საათიდან 05:00 საათამდე.