სამხედრო გადატრიალება მიანმარში - სამხედროებმა სხვა პირებთან ერთად, არჩეული ქალი ლიდერი დააკავეს და საგანგებო მდგომარეობა გამოაცხადეს

სამხედრო გადატრიალება მიანმარში - სამხედროებმა სხვა პირებთან ერთად, არჩეული ქალი ლიდერი დააკავეს და საგანგებო მდგომარეობა გამოაცხადეს.

მიანმარში სამხედრო გადატრიალება მოხდა და არჩეული ლიდერი, პარტიის "ეროვნული ლიგა დემოკრატიისთვის" ხელმძღვანელი აუნგ სან სუ ჩიი, ქვეყნის პრეზიდენტი, ვინ მიინი და სხვა პოლიტიკური ლიდერები დააკავეს.

დაკავებებიდან რამდენიმე საათში სამხედრო ტელევიზიით ქვეყანაში 1 წლით საგანგებო მდგომარეობის დაწესების შესახებ განაცხადეს.

როგორც BBC წერს, მიმდინარე პროცესები ქვეყანას საშიშ გზაზე აყენებს.

გამოცემის ცნობით, ამ დროისთვის არ მუშაობს ზოგიერთი მობილური კავშირი და ასევე მობილური ინტერნეტი. სახელმწიფო მაუწყებლობა აცხადებს, რომ ტექნიკური პრობლემები აქვს და არ მაუწყებლობს.

მაუწყებლობა შესაძლებლობა დაუბლოკეს BBC-ის და სხვა საერთაშორისო მაუწყებლებს. ბანკომატებთან ნაღდი ფულის გამოსატანად დიდი რიგებია. ბანკებმა დროებით შეაჩერეს ფინანსური მომსახურების გაწევა.

გადატრიალებას სამოქალაქო მთავრობასა და სამხედროებს შორის ქვეყანაში ჩატარებული არჩევნების საკითხზე დაძაბულობა უძღოდა. გასული წლის ნოემბრის არჩევნებში აუნგ სან სუ ჩიის პარტიამ მთავრობის ფორმირებისთვის საკმარისი საპარლამენტო ადგილები მოიპოვა, თუმცა ქვეყნის არმია ირწმუნება, რომ არჩევნები გაყალბებით ჩატარდა.

შეერთებულმა შტატებმა მიანმარში მომხდარი გადატრიალება დაგმო და განაცხადა, რომ ვაშინგტონი "არჩევნების შედეგების შეცვლის, ან მიანმარში ხელისუფლების დემოკრატიულად გადაცემის შეფერხების მცდელობის წინააღმდეგია".

აშშ-ის სახელმწიფო მდივანმა ანტონი ბლინკენმა სამხედროებს მთავრობის წარმომადგენლებისა და სამოქალაქო საზოგადოების ლიდერების დაუყოვნებლივ განთავისუფლებისკენ მოუწოდა.