მელია ელისაშვილს პასუხობს: "არ მომიყვანო მაგ პარლამენტში, ჩემი ხელით გამოგიყვან"

"არ მომიყვანო მაგ პარლამენტში, ჩემი ხელით გამოგიყვან პარლამენტიდან" - ასე პასუხობს „ნაციონალური მოძრაობის“ თავმჯდომარე, ნიკა მელია ალეკო ელისაშვილის განცხადებას, რომ მზადაა თავისი ხელფასი ნიკა მელიას გირაოს გადასახდელად გადაურიცხოს.

როგორც მელია აღნიშნავს, მას არ სჭირდება, რომ ვინმემ გირაო გადაუხადოს.

"ჩემი ფეხით არ მომიყვანო, ალეკო, მაგ პარლამენტში, ჩემი ხელით გამოგიყვან პარლამენტიდან. აგიღებ და გამოგიტან გარეთ, მართლა არ მომიყვანო. რა, შენი ხელფასიდან გადამიხდი? - განაცხადა მელიამ.

მოგვიანებით, ნიკა მელიას განცხადებას უპასუხა ალეკო ელისაშვილმა. მისი თქმით, მელიას ზედმეტი მოუვიდა:

"ვიღაცამ შეიძლება მითხრას, რას ექომაგები იმ კაცს, რომელიც დილიდან შენზე საძაგლობებს იძახისო. ფაქტია, ნიკა მელია ჩემთან მიმართებით ზღვარს გაცდა, სიტყვა გაექცა და ზედმეტები მოსდის, თუმცა, მძიმე ემოციური ფონი აქვს, მაინც ამას მივაწერ და ამით გავამართლებ მის ქმედებას. ამდენად გთხოვდით და მოგიწოდებდით, რომ თუ გვინდა ნორმალური ქვეყანა, რა დამოკიდებულებაც არ უნდა გქონდეთ ნიკა მელიას ან „ნაციონალური მოძრაობისადმი“ არ დაუჭიროთ მხარი მისთვის უფლებამოსილების შეწყვეტის საკითხს" - განაცხადა "მოქალაქეების" ლიდერმა.