"პირზე ხელი ამაფარა, მირტყამდა...სულ ნაცემი ვარ" - ყვარელში 73 წლის ქალი შეიარაღებულმა ახალგაზრდამ დააყაჩაღა
ყვარლის მუნიციპალიტეტში 73 წლის ქალი დააყაჩაღეს. შემთხვევა სოფელ ახალსოფელში გუშინ მოხდა.
არსებული ინფორმაციით, ნიღბიანი ახალგაზრდა, რომელიც ცივი იარაღით შეიარაღებული იყო, აკოფაშვილის სასურსათო მაღაზიაში უკანა კარიდან შეიჭრა, ხანდაზმულს ფიზიკურად გაუსწორდა, ცივი იარაღით დაემუქრა, რის შემდეგაც 1500 ლარი და ძვირფასეულობა წაიღო.
ქალი მიყენებული დაზიანებებით სამედიცინო დაწესებულებაში მოათავსეს.
"დილა იყო რვის ნახევარი,უკანა კარიდან შემოვედი, ბუხარი უნდა ამენთო. ახალგაზრდა შემომყვა, ნიღაბი ეკეთა. პირზე ხელი ამაფარა, მცემდა მირტყამდა, ბებო ფული მომეციო. თან ყელზე დანას მადებდა, მოგკლავო.
ვეხვეწებოდი არ მომკლა და წაიღე, რაც გინდა - მეთქი. ხელზე ბეჭედი მეკეთა, მომაძრო და კიდევ ფული იყო 1500 ლარი, ისიც წაიღო. ხელები შემოჰკრა. მერე რო წავიდა, მეზობლები მოვიდნენ საშველად.სახეზე სულ ნაცემი ვარ, მირტყამდა. მერე პოლიცია გამოვიძახეთ ", - ამბობს დაზარალებული.
შინაგან საქმეთა სამინისტრომ გამოძიება 179-ე მუხლით დაიწყო, რაც ყაჩაღობას გულისხმობს. უწყების ცნობით, სავარაუდო დამნაშავე ცხელ კვალზე დააკავეს.
"სასამართლოს გადაწყვეტილებას დღეს აღვასრულებთ, ხვალ, ერთი თვის შემდეგ თუ სამ დღეში, შეზღუდული არ არის" - გომელაური მელიაზე
შსს-ს ინფორმაციით, პარლამენტთან საპროტესტო აქციაზე დაპირისპირებისას სულ 8 პირია დაკავებული
