ირაკლი ღარიბაშვილმა ორი ახალი ვიცე-პრემიერი წარადგინა
საქართველოს პრემიერ-მინისტრმა ირაკლი ღარიბაშვილმა ორი ახალი ვიცე-პრემიერი წარადგინა. ამ პოსტებს დღეიდან ფინანსთა მინისტრი ივანე მაჭავარიანი და საგარეო საქმეთა მინისტრი დავით ზალკალიანი დაიკავებენ.
შესაბამისი გადაწყვეტილების შესახებ ღარიბაშვილმა მთავრობის სხდომაზე ისაუბრა.
"ჩვენ გვეყოლება დღეიდან ორი ვიცე-პრემიერი - დავით ზალკალიანი და ივანე მაჭავარიანი" - განაცხადა პრემიერმა.
შეგახსენებთ, საქართველოს პარლამენტმა მთავრობის განახლებული შემადგენლობა 22 თებერვალს დაამტკიცა. ირაკლი ღარიბაშვილის მიერ წარდგენილ მინისტრთა კაბინეტსა და სამთავრობო პროგრამას ნდობა 89 ხმით გამოუცხადეს. 2 - მა დეპუტატმა ხმა მის წინააღმდეგ მისცა.
მთავრობის განახლებული შემადგენლობისათვის ნდობის გამოცხადების საკითხი პრემიერის პოსტიდან გიორგი გახარიას გადადგომამ გამოიწვია, რაც პარტია “ნაციონალური მოძრაობის“ თავმჯდომარის ნიკა მელიასათვის აღკვეთის ღონისძიებად პატიმრობის შეფარდების გადაწყვეტილებას მოჰყვა. როგორც გახარიამ განაცხადა, სასამართლოს გადაწყვეტილების აღსრულების საკითხზე მასსა და მმართველ გუნდს შორის აზრთა სხვადასხვაობა იყო.
პარლამენტთან აქტივისტები კიდევ ერთი კარვის გაშლას ცდილობდნენ, რასაც ხმაური მოჰყვა
"გული მწყდება, მთელი საქართველო, მსოფლიო ლაპარაკობდა და ვაშაძეს ხმა არ ამოუღია" - მელია
