"საქართველოს რკინიგზამ" სამგზავრო გადაყვანა დღეიდან განაახლა - რა რეკომენდაციების დაცვა მოუწევთ მგზავრებს?
სამთვიანი პაუზის შემდეგ "საქართველოს რკინიგზამ" სამგზავრო გადაყვანები დღეიდან განაახლა. როგორც „ინტერპრესნიუსს“ "საქართველოს რკინიგზიდან" აცნობეს, მატარებლებმა მაგისტრალურ მიმართულებებზე მოძრაობა დღეიდან დაიწყეს.
მათი ინფორმაციით, კომპანია მოძრაობას შემდეგ რეისებზე აღადგენს: თბილისი-ბათუმი-თბილისი; თბილისი-ზუგდიდი-თბილისი; თბილისი-ოზურგეთი-თბილისი; თბილისი-ფოთი-თბილისი და თბილისი-ქუთაისი-თბილისი.
"რაც შეეხება კოვიდ 19-თან დაკავშირებულ რეკომენდაციებს: გამცილებლები მგზავრებს ვაგონის შესასვლელებში ჩაუტარებენ თერმოსკრინინგს, მატარებელში შესვლისთანავე კი მათ უნდა გაიარონ დეზობარიერი და ხელები დაიმუშაონ სადეზინფექციო ხსნარით. ხელის დისპენსერები ყველა ვაგონში იქნება დამონტაჟებული.
მნიშვნელოვანია მგზავრებმა წინასწარ იცოდნენ, რომ ვირუსისთვის დამახასიათებელი სიმპტომების არსებობის შემთხვევაში არ გამოცხადდნენ გასამგზავრებლად. პირბადის გარეშე მგზავრები არ დაიშვებიან და მგზავრობის პროცესში მათ არ აქვთ პირბადის მოხსნის უფლება. საქართველოს რკინიგზა მგზავრებს ყველა ზემოთაღნიშნული რეკომენდაციის დაცვისკენ მოუწოდებს", - აღნიშნულია ინფორმაციაში.
6 შეზღუდვა, რომელიც ორშაბათიდან მოიხსნება
373 ახალი ინფიცირებული და 14 გარდაცვლილი - რამდენ ადამიანს ჩაუტარდა ტესტირება 24 საათში და როგორია მონაცემები რეგიონების მიხედვით?
