სან დიეგოს ზოოპარკში მაიმუნებს კორონავირუსის საწინააღმდეგო ექსპერიმენტული ვაქცინა გაუკეთეს

სან დიეგოს ზოოპარკში რამდენიმე მაიმუნს კორონავირუსის საწინააღმდეგო ექსპერიმენტული ვაქცინა გაუკეთეს. გადაწყვეტილება მას შემდეგ მიიღეს, რაც ზოოპარკში კორონავირუსის ეპიდაფეთქება მოხდა ვირუსი მის არაერთ ბინადარს გამოუვლინდა.

ვეტერინარული ფარმაკოლოგიური კომპანიის, Zoetis მიერ შექმნილი ვაქცინა 6 მაიმუნს გაუკეთდა. თითოს, ორი დოზა. როგორც BBC წერს ზოოპარკის ბინადარ 8 გორილას ვირუსი იანვარში დაუდგინდა და ახლა გამოჯანმრთელების გზას ადგანან.

სან დიეგოს ზოოპარკში აცხადებენ, რომ არც ერთ პრიმატს არ გამოვლენია გვერდითი ეფექტი ვაქცინის გაკეთების შემდეგ და ამ ეტაპზე ისინი თავს კარგად გრძნობენ.

ვაქცინა ექსპერიმენტულია და მეცნიერები ამბობენ, რომ ახლა შედეგს უნდა დაელოდონ. ცხოველებს რამდენიმე დღეში ჩაუტარდებათ ტესტი, რომლითაც გაირკვევა გამოუმუშავდათ თუ არა მათ ანტისხეულები და რამდენად ეფექტიანია ვაქცინა.

კორონავირუსი იშვიათად, თუმცა მაინც ვლინდება ცხოველთა სხვადასხვა სახეობებში, რაც შეშფოთებას იწვევს. დაწყებულია კორონავირუსის საწინააღმდეგო ვაქცინის შემუშავება ძაღლებისა და კატებისთვისაც, რომელსაც ლომებისა და ვეფხვების ასაცრელადაც გამოიყენებენ.