"ქალბატონი გიული ალასანია ჩემი ხშირი სტუმარი იყო" - რას იხსენებს ღარიბაშვილი და როგორ ხსნის სკანდალური ჩანაწერის ფრაზას, რომ "მინისტრები დაურეკავდნენ"

პრემიერ-მინისტრი ირაკლი ღარიბაშვილი გავრცელებულ ჩანაწერებთან დაკავშირებით, სადაც მისი და ბერა ივანიშვილის საუბარი ისმის, პირველ კომენტარს აკეთებს. პრემიერი ჩანაწერებს ფაბრიკაციას უწოდებს.

"ძალიან კარგად გვესმის საიდან, ვისგან მომდინარეობს აღნიშნული პროვოკაცია... ეს არის მიხეილ სააკაშვილის მცდელობა, მით უმეტეს იმ დროს, როცა გამოიკვეთა რეალური კონტურები პოლიტიკური შეთანხმების მიღწევის ხელისუფლებასა და ოპოზიციას შორის, სწორედ მაშინ იქნა გამოყენებული ეს უბინძურესი პროვოკაცია, სიყალბე, ფაბრიკაცია. ეს ჩანაწერები არის ფაბრიკაცია, 11 წლის წინანდელი ჩანაწერების, კიდევ ერთხელ დადასტურდა რომ მაშინ ჩვენ ვიყავით ტოტალური კონტროლის, მოსმენების მსხვერპლი და ყველას უსმენდნენ. ეს არის ყოვლად დაუშვებელი და მიუღებელი.

ჩანაწერი შედგება უამრავი საუბრებისგან, ეს არის ჩვეულებრივი ფაბრიკაცია.

საუბარია იყო იმაზე, თუ რატომ ახსენებდა ბერა ივანიშვილი ჩემთან საუბარში, რომ მინისტრები დამირეკავდნენ. მინდა, განმრატება გავაკეთო მოსახლეობისთვის, მე 8 წლის განმავლობაში ვხელმძღვანელობდი ბატონი ბიძინა ივანიშვილის საქველმოქმედო ფონდს. ვმართავდით საქველმოქმედო პროექტებს საქართველოში და ბუნებრივია, მაშინ მე მიწევდა პირდაპირი კომუნიკაცია მთავრობის უწყებებთან, მინისტრებთან.

მიწევდა შეხვედრა ასევე სააკაშვილის მეუღლესთან, არაერთ პროექტზე გვქონდა მოლაპარაკებები და მათი თხოვნების მოსმენა გვიწევდა, პრეზიდენტის დედა, ქალბატონი გიული ალასანია ჩემი ხშირი სტუმარი იყო, როცა მე ვიყავი ფონდის ხელმძღვანელი.

აქედან გამომდინარე, პასუხი ძალიან მარტივია, პირდაპირი კომუნიკაცია მქონდა მინისტრთა კაბინეტის წევრებთან, არანაირი ლოგიკა არ არსებობს იმაზე, თუ რატომ უნდა ყოფილიყო სხვანაირად აღქმული ეს საკითხი" - აღნიშნა ღარიბაშვილმა.

ცნობისთვის "ტვ პირველმა" გაავრცელა ფარული აუდიოჩანაწერები, სადაც ბერა ივანიშვილი ირაკლი ღარიბაშვილს სოციალურ ქსელში მისთვის არასასურველი კომენტარის დაწერის გამო, სავარაუდოდ, არასრულწლოვნის დასჯის შესახებ ესაუბრება.