ავტორი:

"დიახ, ბატონ ბიძინასთან მაქვს ურთიერთობა. მართლაც ვარ ჩართული წყალტუბოს და აბასთუმნის პროექტებში" - ვინ არის სოსო ტყემალაძე, რა აკავშირებს ირაკლი კობახიძის მამასთან და რაგბთან?

"დიახ, ბატონ ბიძინასთან მაქვს ურთიერთობა. მართლაც ვარ ჩართული წყალტუბოს და აბასთუმნის პროექტებში" - ვინ არის სოსო ტყემალაძე, რა აკავშირებს ირაკლი კობახიძის მამასთან და რაგბთან?

საქართველოს რაგბის კავშირის პრეზიდენტი ბიზნესმენი იოსებ (სოსო) ტყემალაძე გახდა. პრეზიდენტის არჩევნები 10 მარტს "ექსპო ჯორჯიაში“ ხმაურის ფონზე მიმდინარეობდა. ერთმანეთს ირაკლი აბუსერიძისა და სოსო ტყემალაძის მომხრეები დაუპირისპირდნენ. ირაკლი აბუსერიძის მხარდამჭერები ამ არჩევნებს არალეგიტიმურად აფასებენ და მიიჩნევენ, რომ პრეზიდენტი უკვე არჩეულია და ის ირაკლი აბუსერიძეა.

ცნობისათვის: სოსო ტყემალაძე პრეზიდენტობის ერთადერთი კანდიდატი იყო. ყრილობაზე ტყემალაძის კანდიდატურას 42-მა დელეგატმა დაუჭირა მხარი. სოსო ტყემალაძის განცხადებით, რაგბის კავშირი სამუშაო რეჟიმს მალე დაუბრუნდება.

როგორც ცნობილია, რაგბის კავშირის პრეზიდენტის საკითხი დიდი ხანია სადავოა: არჩევნები ჯერ კიდევ 2020 წლის 30 იანვარს უნდა ჩატარებულიყო, თუმცა, ორი კანდიდატის, ირაკლი აბუსერიძისა და ლაშა (ბაჩო) ხურციძის განცხადების საფუძველზე, 24 თებერვლისთვის გადაიდო. 2020 წლის 24 თებერვალს კი კენჭისყრა კვორუმის (ანუ საკმარისი წევრების) არარსებობის გამო, ვერ შედგა. საბოლოოდ, არჩევნები 2020 წლის 30 დეკემბერს ჩატარდა. კენჭისყრაში მონაწილეობდნენ მოქმედი პრეზიდენტი გოჩა სვანიძე, 2016-20 წლების პარლამენტის წევრი ირაკლი აბუსერიძე და ლაშა (ბაჩო) ხურციძე, თუმცა ხურციძემ პროცესს ბოიკოტი გამოუცხადა და საკუთარ მხარდამჭერებს მოუწოდა, არჩევნებში მონაწილეობა არ მიეღოთ.

დარჩენილმა წევრებმა პრეზიდენტად ირაკლი აბუსერიძე აირჩიეს. აქედან ერთ კვირაში, 2021 წლის 6 იანვარს, ირაკლი აბუსერიძემ განცხადებით მიმართა საჯარო რეესტრის ეროვნულ სააგენტოს და მოითხოვა რეგისტრაცია "საქართველოს რაგბის კავშირის“ პრეზიდენტად და გამგეობის ახალ წევრად. მანვე მოითხოვა გამგეობის ახალი წევრების რეგისტრაცია. საჯარო რეესტრმა აბუსერიძე პრეზიდენტად არ დაარეგისტრირა იმ მოტივით, რომ ყრილობა რაგბის კავშირის წესდების დარღვევით ჩატარდა. ყრილობა 2020 წლის 24 თებერვალს გამართული საერთო კრებიდან 30 დღის განმავლობაში უნდა ჩატარებულიყო, თუმცა კორონავირუსის გამო გადაიდო. საჯარო რეესტრმა ეს დარღვევად ჩათვალა და მისი გამოსწორება მოითხოვა.

საჯარო რეესტრი უკვე ემზადება სოსო ტყემალაძე ოფიციალურად დაარეგისტრიროს რაგბის კავშირის პრეზიდენტად . ირაკლი აბუსერიძე ambebi.ge-სთან ამბობს, რომ სოსო ტყემალაძე ძალადობით დასმული პრეზიდენტია, ამიტომ გაჩერებას არ აპირებს - სამართლებრივი ბრძოლა გაგრძელდება როგორც საქართველოში, ასევე მის ფარგლებს გარეთაც.

"საჯარო რეესტრი გვედავება, ფორსმაჟორი იყოო და ახლა უნდა ვუმტკიცოთ, იყო თუ არა, რაც ჩემთვის გაუგებარია. იურისტი არ გახლავართ, მაგრამ იურისტების მთელს არმიას სასაცილოდ არ ეყო ის მოტივი, რაც დაგვიწერეს. ძალით მოსული და დასმულია ეს ტყემალაძე. ვერ გეტყვით, კონკრეტულად ვინ მფარველობს, მაგრამ მფარველები რომ ჰყავს, უდავოა. დასკვნები თქვენ გამოიტანეთ...

მეც ვიყავი 4 წელი მე-9 მოწვევის პარლამენტში, მაგრამ პოლიტიკა არასდროს ჩამირევია სპორტში. საერთოდ, ყველამ უნდა ვეცადოთ, აპოლიტიკურად დარჩეს რაგბი, ვინაიდან აქ ღირსეული ხალხია და ვცდილობდით, ყოველთვის გამიჯნულები ვყოფილიყავით და საქმით დაგვემტკიცებინა ჩვენი ქვეყნის სიყვარული და ღირსეულად წარმოგვეჩინა მსოფლიო ასპარეზზე. რიგი ხარვეზები იყო ხმების დათვლის პროცესში, ასევე მინდობილობების კუთხით და ორმაგი სტანდარტი ახლა გამოჩნდება - რას იზამს და რა გადაწყვეტილებას მიიღებს საჯარო რეესტრი. თუ ერთის მხრივ, ჩემი წესდების მიხედვით იყო 30-დღიანი ვადის დარღვევა, მაშინ ახლაც გამოჩნდება, რომ ხმების დათვლაშიც დარღვევაა და ნოტარიული დოკუმენტებიც ხარვეზიანია. ტყემალაძეს ხმების უმრავლესობა არ მიუღია, ძალადობით შეასრულა კვორუმი. ჩვენ ვიბრძოლებთ და ვნახოთ, რა გამოვა იმიტომ, რომ რაც ამ არჩევნებზე ხდებოდა, სამარცხვინოა და გულის ამრევი“.

ირაკლი აბუსერიძეს, რომელიც საქართველოს ნაკრების კაპიტანი გახლდათ, 2014-დან 2016 წლამდე საკრებულოს წევრი, 2016-დან 2020-მდე კი პარლამენტის მაჟორიტარი დეპუტატი იყო ბლოკიდან "ქართული ოცნება-დემოკრატიული საქართველო“.

ის ჩვენთან საუბარში ამბობს, რომ "ოცნება“ არ დაუტოვებია, "არც კი ვიცი, ვარ თუ არა პარტიის წევრი, მე ჩემი ნებით არ წამოვსულვარ...", - ამბობს აბუსერიძე.

როგორც ირკვევა, თავის დროზე ირაკლი აბუსერიძე "ქართულ ოცნებაში" ექსპრემიერ გიორგი კვირიკაშვილთან მეგობარობის გამო მოხვდა, "ოცნებიდან“ კი კარგა ხანია, რაც გაუშვეს.

პრეზიდენტის არჩევნების შემდეგ, ასევე დამტკიცდა რაგბის კავშირის გამგეობა. როგორც გაირკვა, მისი შემადგენლობა უცვლელი დარჩა, უბრალოდ, გაიზარდა "ქართული ოცნების“ ე.წ. წარმომადგენელთა რაოდენობა. მასში ახლა უკვე "ოცნებასთან" აფილირებული გამგეობის 4 წევრია. ესენი არიან: გივი ჭიჭინაძე, ალექსანდრე გრიგალავა, გიორგი კობახიძე და გაიოზ მონიავა.

გარდა იმისა, რომ ახლადარჩეული პრეზიდენტი "ოცნების“ ფავორიტია, გავრცელდა ინფორმაცია, რომ ტყემალაძე რაგბის კავშირის გამგეობის წევრისა და ყოფილი რაგბისტის - გიორგი კობახიძის (ირაკლი კობახიძის მამის) მეგობარიცაა. ambebi.ge ამ ინფორმაციის გადასამოწმებლად გიორგი კობახიძეს დაუკავშირდა, რომელმაც აღნიშნული ინფორმაცია არ დაადასტურა:

"დიდი ხანია, რაც რაგბის კავშირის გამგეობის წევრი ვარ. სოსო გავიცანი გასული წლის მარტში და მას მერე იანვრამდე ორჯერ შევხვდი სულ... ამიტომ ინფორმაცია ჩვენი მეგობრობის შესახებ სიმართლე არაა. ჯერ რეესტრმა დაარეგისტრიროს პრეზიდენტად და მერე ვისაუბრებთ თავისუფლად, არ მინდა, მოვლენებს გავუსწროთ. დანარჩენი სოსოსთან გაარკვიეთ, არაა ის კაცი, რომ რამე დამალოს".

  • ვინ არის იოსებ ტყემალაძე?

რაც შეეხება ახლ პრეზიდენტ სოსო ტყემალაძეს, გავრცელებული ინფორმაციის თანახმად, ის ბიძინა ივანიშვილთან დაახლოებული პირია. ბიზნესმენთან და ხელისუფლების მაღალჩინოსნებთან მეგობრულ ურთიერთობებს თავად ტყემალაძეც გვიდასტურებს. როგორც ირკვევა, იოსებ ტყემალაძე ბიზნესმენია, რომელიც ჩართულია აბასთუმნისა და წყალტუბოს პროექტებში, რაც ექსპრემიერ ბიძინა ივანიშვილის სახელს უკავშირდება. ამბობენ, რომ სოსო ტყემალაძემ ივანიშვილი, სავარაუდოდ, ბიძისგან გაიცნო, რომელიც ოლიგარქთან საკმაოდ დაახლოებული პირია - თემურ ტყემალაძე დენდროლოგია. რაგბის კავშირში დარწმუნებულები არიან, რომ ტყემელაძის დანიშვნა სწორედ ბიძინა ივანიშვილს უკავშირდება.

ambebi.ge რაგბის კავშირის ახალარჩეულ პრეზიდენტ იოსებ ტყემალაძეს დაუკავშირდა, რომელიც მისი მისამართით გავრცელებულ ხმებს ცილისწამებას უწოდებს.

"ისევე, როგორც ყველა ქართველი, რაც შეიძლება ვეხმარები და მინდა დავეხმარო სპორტის ამ სახეობას. პრეზიდენტის არჩევნები ჩატარდა, დელეგატებმა მომცეს ხმა და ახლა ველოდები საჯარო რეესტრს, თუ დამარეგისტრირებს პრეზიდენტად, ვიქნები კანონიერი პრეზიდენტი, არ დამარეგისტრირებს და მათსავით არ დავიწყებ განცხადებებისა და ცილისწამებების გავრცელებას. ამ ეტაპზე მაქვს ხმათა უმრავლესობა და ძალიან მალე რაგბის კავშირს ეყოლება პრეზიდენტი. 20 წელზე მეტია ჩართული ვარ ამ საქმეში და რაგბი, როგორც ყველას, ძალიან მიყვარს და ხაზგასმით მინდა დაწეროთ, რომ რაგბი მხოლოდ მორაგბეების არ არის, ის ეროვნული სპორტია, მთელი ერისაა. აქამდე კლუბ "ლელოსთან“ ძალიან მჭიდრო ურთიერთობა მქონდა და თუ მან რაიმე წარმატებას მიაღწია, ამაში მეც მიმიძღვის წვლილი. შემდეგ უკვე, წლების განმავლობაში ვეხმარებოდი რაგბის კავშირის პრეზიდენტებს - ბატონ ნიჟარაძეს და სვანიძეს. ვიცი და კარგად მესმის, რა ხდება რაგბის ოჯახში, როგორ აღმოიფხვრას პრობლემები და როგორ უნდა განვავითაროთ ეს სპორტი.

ჩემს მოყვანაში ბატონ ბიძინა ივანიშვილს რაში უნდა მიუძღოდეს წვლილი, ხმა აქვს, დელეგატია, თუ რა? არც ერთი პარტიის წევრი არ ვარ. მე ვიყავი "ოცნების“ დეპუტატი წლების განმავლობაში, თუ აბუსერიძე და მას ჰკითხეთ, რატომ არ აქვს მხარდაჭერა?

დასამალი არაფერი მაქვს და ვიტყვი, რომ ბატონ ბიძინასთან მაქვს ურთიერთობა ისევე, როგორც ბევრ სხვა ბიზნესმენთან, როგორც ქვეყნის შიგნით, ისე - გარეთ. რაგბიში ჩემამდეც იყო ბატონი ბიძინა და ჩემს მერეც იქნება. მართლაც ვარ ჩართული წყალტუბოს და აბასთუმნის პროექტებში და იმის მენეჯმენტს ვუკეთებ, როგორ გავხადოთ კურორტები საუკეთესო ჩვენს ქვეყანაში. ამაში ვეხმარები ბატონ ბიძინას და მგონი, კარგის მეტს, არაფერს ვაკეთებ ჩემი ქვეყნისთვის. ის ძალადობა, სიცრუე და ცილისწამება, რაც მათგან მოდის, ამ არჩევნებით დასრულდა და კიდევ რაღაცებს აანონსებენ. ეს აგრესია უნდა დასრულდეს და მივხედოთ სპორტს. დარწმუნებული ვარ, ყველაფერი კანონის ჩარჩოში და მშვიდობიანად დასრულდება“, - გვეუბნება ტყემალაძე.

დავით ზილფიმიანს გულზე გადაუდებელი ოპერაცია ჩაუტარდა - როგორია დეპუტატის მდგომარეობა?

LIVE - ეთერშია გადაცემა "360 გრადუსი"

LIVE - ეთერშია გადაცემა "რეზიუმე"