შიდა ქართლში "ასტრაზენეკას" 2600 დოზა ვაქცინა ჩაიტანეს - როგორ გადანაწილდება ვაქცინა რაიონების მიხედვით

კოვიდ 19-ის ვაქცინის 2600 დოზა ცოტა ხნის წინ შიდა ქართლში ჩაიტანეს. დაავადებათა კონტროლისა და საზოგადოებრივი ჯანმრთელობის ეროვნული ცენტრის რეგიონული მართვის დეპარტამენტის შიდა ქართლის განყოფილების უფროსის, ეკა ქორჩაშვილის განცხადებით, აღნიშნული რაოდენობიდან 1300 დოზა გათვლილია გორზე, 500 - ხაშურზე, 400-400 დოზა კი, კასპსა და ქარელზე.

"შიდა ქართლის რეგიონი პირველ ეტაპზე უკვე უზრუნველყოფილია „ასტრაზენეკას“ 2600 დოზა ვაქცინით. ვაქცინაცია დაიწყება 15 მარტს. როგორც ცნობილია, პირველ ეტაპზე პრიორიტეტული ჯგუფები მოიცავს - მედპერსონალს, ექიმებს, ექთნებს, უმცროს სამედიცინო პერსონალს. რეგიონში შეირჩა 5 ლოკაცია, სადაც ჩატარდება ვაქცინაცია. ვაქცინაციის პროცესის განხორციელებისთვის, კასპში ერთი, დანარჩენ სამედიცინო ცენტრებში ორ-ორი ჯგუფია სპეციალურად გადამზადებული, ასევე, თავდაცვის სამინისტროს გორის სამხედრო ჰოსპიტალში გადამზადებულია მესამე - სარეზერვო ჯგუფიც.

მედპერსონალის ვაქცინაცია განხორციელდება სპეციალურ ონლაინ პლატფორმაზე რეგისტრაციის მიხედვით. 15 მარტს ვაქცინაცია დაიწყება გორში, კლინიკა ,,გორმედსა" და სამხედრო ჰოსპიტალში. 17 მარტს კი - კასპში, ქარელსა და ხაშურში.

ყველა იმ პირს, ვისაც ჩაუტარდება ვაქცინაცია, გადაეცემა აცრების ბარათი, სადაც მინიშნება მეორე, ანუ რევაქცინაციის თარიღიც, რომელიც 4-დან 8 კვირამდე ინტერვალს ითვალისწინებს", - განაცხადა ,,ინტერპრესნიუსთან" დაავადებათა კონტროლისა და საზოგადოებრივი ჯანმრთელობის ეროვნული ცენტრის რეგიონული მართვის დეპარტამენტის შიდა ქართლის განყოფილების უფროსმა.