"კონტრაქტით, ნელიმ მლნ-ზე მეტის ღირებულების ქონება მიიღო, სახლი და კომერციული ფართი, საიდანაც თვიურად ათასობით ლარს იღებს, დამატებით ითხოვს სხვა სახლს" - ბასილაშვილის ადვოკატი
ქართველი ჩოგბურთელის ნიკოლოზ ბასილაშვილის ადვოკატი, ირმა ჭკადუა AMBEBI.GE-სთან მისი დაცვის ქვეშ მყოფის ოჯახური სასამართლო დავის დეტალებზე საუბრობს. ჩოგბურთელის ყოფილი მეუღლის, ნეკა დოროყაშვილის ადვოკატებისა და ქალთა უფლებების დამცველთა მიერ ბოლო დღეებში გაკეთებული განცხადებეის შემდეგ, რომლებიც წყვილს შორის ქონებრივი დავის დეტალებსაც შეეხებოდა, ირმა ჭკადუა განმარტებებს აკეთებს.
"მისი ყოფილი მეუღლე და ბავშვი სრულად უზრუნვეყოფილი არიან როგორც სოციალურად, ასევე ეკონომიურად. კონტრაქტის საფუძველზე მათ მიიღეს მილიონზე მეტის ღირებულების ქონება, რაც მოიცავს საცხოვრებელ სახლს და კომერციულ ფართს. ფართიდან ყოველთვიურად რამდენიმე ათასი ლარი აქვთ შემოსავალი. ასევე 2020 წლის დეკემბერში ცოლმა ნიკასგან საკმაოდ სოლიდური თანხა მიიღო, თანხის დასახელებისგან თავს შევიკავებ. მერწმუნეთ ის სრულად არის უზრუნველყოფილი. ჩვენ დავინახეთ ნიკოლოზ ბასილაშვილის დამოკიდებულება შვილისადმი, თუ რამდენად გულწრფელია და დანარჩენის შეფასება საზოგადოებისთვის მიგვინდვია. ვინ არის გულწრფელი და ვინ არის ყალბი ამ ისტორიაში, ეს აშკარად ჩანს.
რაც შეეხება ალიმენტს, საერთოდ არ აქვს მას დაკისრებული ალიმენტი სასამართლოს მხრიდან, ვინაიდან მათ შორის საკონტრაქტო სხვა პირობები იყო გათვალისწინებული. რას ქვია ალიმენტი, როცა სხვა შემოსავლებით ხარ უზრულველყოფილი. მას ჰქონდა გარკვეული პერიოდის განმავლობაში ალიმენტიც გადახდილი, ხოლო ამჟამად ახალი სარჩელით მიმართა სასამართლოს ნელი დოროყაშვილმა და ითხოვს გარკვეულ ალიმენტს.
ცალსახად შემიძლია ვთქვა, რომ ბავშვს აქვს საცხოვრებელი სახლი, სადაც ის ცხოვრობს და კომერციული ფართი, საიდანაც იღებენ შემოსავლებს და არის სრულად უზრუნველყოფილი.
არა ეს ტყუილია, რომ ამ სახლის წართმევაზეა შეტანილია საჩივარი სასამართლოში, დოროყაშვილი დამატებით ითხოვს კიდევ სხვა სახლს. იქნებ დაინტერესდეთ, ვის ნაყიდ სახლში ცხოვრობს ამჟამად ნელი დოროყაშვილი, რომლის ღირებულება დაახლოებით მილიონ ლარამდეა.
კიდევ ერთხელ ვამბობ, ტყუილია, რომ საკუთარ შვილს სახლს ართმევს სახლი, რომელშიც ცხოვრობენ, ნიკა ბასილაშვილის შეძენილია, საკუთარი ხელით გაკეთებული აქვს რემონტი, ასევე ყოფილ ცოლს ჰყავს ავტომანქანა, მისცა კომერციული ფართიც და საკმაოდ სოლიდური შემოსავალი აქვს იქიდან ყოველთვიურად. რაც შეეხება დამატებით სახლს, რომელსაც ახლა დოროყაშვილი ითხოვს, იყო ამ სახლზე საუბარი, საჩუქრად უნდა გადაეცა ბასილაშვილს კიდევ ერთი სახლი მისთვის, მაგრამ გარკვეული პირობების შეუსრულებლობის გამო, მეორე სახლის გადაცემის საკითხი შეჩერებულია", - აცხადებს ირმა ჭკადუა.
ცნობისთვის, ჩოგბურთის დოჰას საერთაშორისო ტურნირის გამარჯვებული საქართველოს პირველი ჩოგანი ნიკოლოზ ბასილაშვილი გახდა და ამით მან კარიერაში ყველაზე მნიშვნელოვანი გამარჯვება მოიპოვა. დაჯილდოვების ცერემონიალზე სიტყვით გამოსვლისას ბასილაშვილმა ქართულად მიმართა შვილს: "ლუკას, მამიკო, მინდა დაიმახსოვრო, შენ ხარ ჩემთვის ყველაზე ძვირფასი ადამიანი, მიყვარხარ და მენატრები. მინდა მადლობა გადავუხადო გულშემატკივრებს საქართველოში, დიდი მადლობა გვერდით დგომისთვის".
საზოგადოებისთვის ცნობილია, ნიკოლოზ ბასილაშვილს ერთადერთი ვაჟი, ლუკასი ჰყავს, რომელიც დედასთან, ნელი (ნეკა) დოროყაშვილთან იზრდება. წყვილი სკანდალურად დაშორდა ერთმანეთს. ცოლმა ის ძალადობაში დაადანაშაულა, რის მერე ჩოგბურთელი დააკავეს კიდეც, თუმცა ბასილაშვილი სასამართლომ გირაოთი გაათავისუფლა. თავად ბასილაშვილი თავს უდანაშაულოდ მიიჩნევს. ამ საქმეზე საბოლოო სასამართლო განხილვა ჯერ არ გამართულა.
ნეკა დოროყაშვილის ინტერესებს არასამთავრობო ორგანიზაცია "პარტნიორობა ადამიანის უფლებებისთვის იცავს". ყოფილ ცოლ-ქმარს შორის დავა გრძელდება.