"დაძრულია, დაახლოებით, ნახევარი მილიონი კუბი მიწა... ეს არის მერიის არქიტექტურის სამსახურის პასუხისმგებლობა" - თეა გოდოლაძე

ვაშლიჯვრისა და ნუცუბიძის ქუჩის დამაკავშირებელი გზა მეორე დღეა გადაკეტილია.

17 მარტს ცნობილი გახდა, რომ აღნიშნულ ტერიტორიაზე მეწყრული პროცესებია დაწყებული. ამ დროისთვის ადგილზე სეისმოლოგები იმყოფებიან და ვითარებას ეცნობიან. ილიაუნის დედამიწის შემსწავლელ მეცნიერებათა ინსტიტუტის ხელმძღვანელი თეა გოდოლაძე ამბობს, რომ მდგომარეობა გამოუვალია. მისი თქმით: "მეწყერული პროცესები დაწყებულია და მას აწი ვერაფერი შეაჩერებს."

"ეს არის მერიის არქიტექტურის სამსახურის პასუხისმგებლობა მთლიანად. იმის ბრალია, რომ მერიას არასწორი სამშენებლო პოლიტიკა აქვს და მშენებლობის ნებართვებს გასცემს ყველაფრის უგულვებელყოფით. ქვეყანაში რომ რეგულაციები არ არსებობს, იმის შედეგია ეს. ახლაც მიმდინარეობს აქ რაღაც სამშენებლო სამუშაოები, რომლებიც დაუყოვნებლივ უნდა შეჩერდეს. დაძრულია, დაახლოებით, ნახევარი მილიონი კუბი მიწა და მეწყერს აწი ვერაფერი შეაჩერებს. ახლა დასათვლელია მასშტაბები. რა მასშტაბის საფრთხე ემუქრება ქალაქს, ამის შეფასება უნდა მოხდეს", - ეუბნება ambebi.ge -ს თეა გოდოლაძე, რომელიც მეწყრულ ზონაში იმყოფება.

Ambebi.ge -მ კომენტარისთვის მიმართა თბილისის მერიას. უწყებაში გვითხრეს, რომ მოგვიანებით დაგვიკავშირდებიან.

იხილეთ ფოტო და ვიდეომასალა