ავტორი:

"13 ივნისი მონაგონი იქნება, ისეთი კატასტროფა მოხდება თბილისში" - როგორ ეხმაურებიან ვაშლიჯვარში განვითარებულ მოვლენებს და რა სცენარებზე საუბრობენ მოქალაქეები

"13 ივნისი მონაგონი იქნება, ისეთი კატასტროფა მოხდება თბილისში" - როგორ ეხმაურებიან ვაშლიჯვარში განვითარებულ მოვლენებს და რა სცენარებზე საუბრობენ მოქალაქეები

სოციალურ ქსელში გავრცელდა ფოტოები, რომელზეც ჩანს, რომ ნუცუბიძისა და ვაშლიჯვრის დამაკავშირებელ გზასთან მდებარე ფერდობზე მეწყრული პროცესი გააქტიურდა. "მაჭავარიანის ქუჩასა და მიმდებარე ფერდებზე განხორციელებული გარკვეული მოქმედებების გამო, მეწყრული პროცესები გააქტიურდა. მოსახლეობის უსაფრთხოების მიზნით, აღნიშნულ ტერიტორიაზე საავტომობილო მოძრაობა ორმხრივად შეიზღუდა.

გავრცელებულმა ფოტოებმა მოსახლეობის შეშფოთება გამოიწვია. აღნიშნულ პროცესებთან დაკავშირებით სოციალურ ქსელებში უამრავი ადამიანი წერს კომენტარს და მოვლენათა განვითარების შესაძლო სცენარებს განიხილავს:

ანა გოდაბრელიძე:

"ვაშლიჯვარში აქამდე გზას კეტავდნენ იმის გამო, რომ მშენებლობა მიდიოდა. დღეს იმიტომ დაკეტეს, რომ "მიწა ჩამოწვაო". ამდენ კლდეს, გორას... რომ ჩამოჭრი ჩამოწვება აბა რა იქნება?!"

რამაზ გიგაური:

"რა ჰესი უნდა ააშენოთ თქვე ბლეყვებო, რა ჰესი? სადაც არის თბილისს დაგვამხობთ თავზე. მხოლოდ ფული რომ გგონიათ ყველაფრის საზომი. და ბუნებას, ადამიანებისგან განსხვავებით, პოლიციის და თქვენზე მორგებული კანონების ძალით ვერ გააჩერებთ. ნახევარ მილიონიდან - 1,3 მილიონამდე კუბური მეტრი მიწა!!! აბა დაფიქრდით! ამ მთის მოწყვეტა მინიმუმ 50-ჯერ უფრო საშიშია, ვიდრე 13 ივნისს ვერეს ხეობაში მომხდარი ტრაგედია"

ნათია ბერიძე:

"ეს, რაც ფოტოებზეა მოცემული, სრულიად ადეკვატურია იმ გაუთავებელი სამშენებლო ქაოსისა, რაც წლებია ამ ტერიტორიაზე ხდება... ასე იცის, როცა საკუთარი ქალაქი გეზიზღება, სამწუხაროდ..."

ინგა სახელაშვილი:

"უფროსი თაობის ხალხს ალბათ ახსოვთ ის, რომ თბილისი იყო დახურული ქალაქი, მე მახსოვს ადამიანები კოჯორში - რუსთავში ცხოვრობდნენ და თბილისში მუშაობდნენ, უჭირდათ სიარული, მაგრამ თბილისში ჩაწერა მხოლოდ გამონაკლის შემთხვევაში შეიძლებოდა და ეს ხდებოდა არა იმიტომ რომ თბილისი - პარიზია ან მილანი, არამედ იმიტომ, რომ თბილისი სეისმოლოგიური ზონაა და მაშინდელმა ექსპერტებმა და არქიტექტორებმა კარგად იცოდნენ, რომ თბილისი "ვერ აიტანდა" მოსკოვივით 8 მილიონ მოსახლეს. დღეს, როდესაც მაგ უპატრონო ქვეყანაში ძაღლების მაგივრად კატებს აყეფებენ, სახლს-სახლზე აშენებენ, რათა ჯიბე გაისქელონ და რაც მერე მოხდება, წიხლზე ჰკიდიათ, უბედურება გარდაუვალია/ღმერთმა არ ქნას.

მე მხოლოდ ერთი კითხვა მაქვს: დავუშვათ არ მიყვარს და მძაგს ჩემი მეზობელი, ჩემმა შვილმა რა დამიშავა, რომ ისიც მძულს? და თუ არ მძულს, მაშ რა ჯანდაბას ვაკეთებ, თუ კი ეკოლოგიურად საზიანო ადგილას ვაცხოვრებ? სანამ ხალხი არ გაიღვიძებს და არ გადაყრის ამ ქართველყლაპია სქელკისერა სახელმწიფო მოხელებს და მთავრობას - მანამდე არაფერი არ ეშველება მაგ ქვეყანას - ეს ჩემი აზრია".

დავით ვაზაგაშვილი:

ეს თუ მოწყდა, რაც დროის ამბავია და ამინდებიც ძალიან შეუწყობს ხელს ჩააღწევს მტკვარში და იქ გააჩენს კაშხალს, ჯერ შეგუბებს და მერე ერთიანად დაარტყავს ორივე სანაპიროს რამდენიმე კილომეტრში ორთაჭალჰესთან მოხდება მეორე შეგუბება და მერე იქ დატრიალდება მეორე ტრაგედია...მე პირადად ევაკუაციას გამოვაცხადებდი, მიწის მასივის ქვემოთ მტკვრამდე არსებულ შენობებში და ახლავე ამოვწევდი ფარებს ორთაჭალჰესზე... პარალელურად მოვჭრიდი მაგ მასას, და ხელახლა მოვაწყობდი რელიეფს.ამ ყველაფერს თუ დავამატებთ მტკვრის სხვა შენაკადებიდან სავარაუდო წყალმოვარდნებს მგონი სიმშვიდის უფლება არ გვაქვს...

500 მეტრია მანძილი სულ (ჰაერით). მაგრამ ეგ 500 მეტრი პოტენციური ნაღმია, თვითონ მოწყვეტილი მიწის მასა შეიძლება 700 მეტრამდე (ჰაერით) ავიდეს, მიწის ფართობი სადღაც 150-200 ათას კვადრატულ მეტრამდე. აპოკალიფსური სცენარია, მაგრამ მერე თითის გაშვერას, აქ გზას რა უნდა, მსახიობების, ჟურნალისტების დისკუსიებს, როგორც ვერეს ხეობაზე მოხდა, ჯობია უარესისთვის მოემზადოს ქალაქი ზარალი ყველა შემთხვევაში იქნება, რამდენი ეგ უკვე ჩვენზეა დამოკიდებული...

მარტო მაგ უბანზე არაა საფრთხე, მიწისქვეშა ბზარები სადაა და რა მოცულობის მასივი მოწყდება ეგ უნდა გაირკვეს, მერე რას ჩაითრევს და სად წავა გზის ქვემოთ მშენებლობა მიდის, შეიძლება იქაც მიმდინარეობს მსგავსი პროცესები, საფუძვლიანი კვლევაა ჩასატარებელი და სასწრაფო რეაგირება...

ვარაუდი დამყარებულია განვითარების ერთ-ერთ შესაძლო სცენარზე. ასე იყო ვერეს ხეობის შემთხვევაშიც, ვერავინ წარმოიდგენდა, რომ ტრაგედიის ადგილიდან ასეთ შორ მანძილზე ჩამოწოლილი მეწყერი, ქაოსში გახვევდა ქალაქს. მაგ ტრაგედიის შემდეგ აღმოჩნდა, რომ ყველამ იცოდა თურმე, რომ ასე მოხდებოდა. მაგრამ ხმას არ იღებდნენ, ათასი სისულელე ითქვა და დაიწერა. ძალიან არ მინდა მსგავსი კიდევ ვიხილო, ხოდა თავს ვალდებულად ვთვლი, ვთქვა ის, რის საშიშროებასაც ვხედავ, ეს არაა მტკიცებითი ფორმა... ძალიან დიდი იმედი და სურვილი მაქვს, ის, რაც ზემოთ დავწერე, მხოლოდ აქ დარჩება და რეალობასთან არასოდეს ექნება საერთო... "

მაგდა მეშველიანი:

"ვაიმე, ხალხნო აგროჰაბის უკან ვცხოვრობ, ზუსტად მანდ, სადაც ეს მშენებლობები მიმდინარეობს და ფაქტობრივად ამ მთის ძირში. რა დამაძინებს ახლა"

სალომე წერეთელი:

"რა საყვარლად შენდება კორპუსები მეწყერსაშიშ ზონებში. ერთ დღესაც 13 ივნისი მონაგონი იქნება, ისეთი კატასტროფა დადგება თბილისში. მარა მერიას რა უნდა მოსთხოვო, ვინც ყიდულობს ასეთ ადგილებში სახლებს იმათ არაფერი ესმით".

ნანა ხელაძე:

"არაპროფესიონალიზმის და სიხარბის კომბინაცია. ეს რა გვჭირს, გაგიჟება შეიძლება, დღე არ ჩაივლის რაღაც საშინელება არ გაიგო".

გელა ლომიძე:

"ერთი გზის გაყვანა დაიწყეს და ლამის მთელი ფერდობი ჩამოიშალოს და ესენი გვიმტკიცებენ, რომ ჰესს სრული წესების დაცვით და უსაფრთხოს ააგებენ"

მანანა ჯობავა:

"ყველაფერს ძირი გამოუთხარეს და ეს ამის ბრალია. და თქვენ გჯერათ, რომ ესენი ჰესს უსაფრთხოდ ააშენებენ. ჩვენ არ ვუფრთხილდებით ჩვენს ქვეყანას და თურქები ან ჩინელები გაუთრთხილდებიან? ეს გაუნათლებლობის, არაპროფესიონალიზმის და ფულის მომხეჭველობლის ბრალია. უკვე ხომ გახდით მილიონერები. შეჩერდით! ბევრს ხომ არ გთხოვთ, ცოტა ქვეყანაზე რომ იფიქროთ. არა? მიწას შენობებიც რომ მიყვეს, მერე სად მიდიხართ?"

მარიამ ნოზაძე:

"ერთ დღესაც გავიღვიძებთ და თბილისის ნახევარი აღარ იარსებებს. როდემდე, ხალხო, როდემდეე, რით ვერ გაძეხით ამდენი მშენებლობით?! ვეღარ იტევს ქალაქი ამდენ დატვირთვას"

ეკატერინე ოდინსონი:

"ეს არის, ხალხო, საგანგაშო სიტუაცია... ერთი წვიმა და სრულიად შეიძლება ჩამოიშალოს...მთა უნდა გამაგრბეულიყო სანამ ძირს გამოუთხრიდნენ..."

ვერიკო ფასინაშვილი:

"კომუნისტები გიჟები კი არ იყვნენ, ეგ მხარე რომ არ აითვისეს, ჯერ სპეციალისტებს შეამოწმებინეთ, თქვე ოჯახაშენებულებო, რატომ წირავთ ხალხს"

მაია ზაალიშვილი:

"არსებობს გეოლოგიური დასკვნა. ნებისმიერი მშენებლობა უნდა იწყებოდეს ამ დასკვნით. არა და არა ეკონომიას ეწევიან და არ ეკითხებიან გეოლოგებს, სად შეიძლება მშენებლობა, სად არა. უამრავი კორპუსია დასკვნის გარეშე აშენებული".

ციცი ჩიხლაძე:

"და ესე შესწავლილი იქნება იმ ჰესების ადგილებიც"

ვაჟა ამირანაშვილი:

"წარმოუდგენელია, დიდი წვიმა რომ მოვა და მანდ წყალი რომ ჩადგება, რა მოხდება!"

ლაშა დარბაიძე:

"მომავალი კვირაში 7 დღე გადაუგებლად წვიმს დაც იმედიაც არ დაიძრება..."

ნანა ბარნაბიშვილი:

"ღმერთო, რატომ არ უყვართ ქვეყანა, რატომ არ სცემენ პროფესიონალიზმს პატივს, რატომ არ უფრთხილდებიან ადამიანის სიცოცხლეს და უამრავი რატომ?"

რენო სირაძე:

"ნურავინ დაიმშვიდებს გულს, რომ შედარებით ვაკე ადგილია და მასა არ დაიძრება. სულ ახლახან ნორვეგიაში მომხდარი კატასტროფა იმის მაგალითია, რომ ასეთ პროფილზეც კარგად მოძრაობს მეწყერი"

გეოლოგ ლაშა სუხიშვილის ვიდეო და ფოტო ადგილიდან:

თბილისის მერის მოადგილის, ირაკლი ბენდელიანის განცხადებით, მაჭავარიანის ქუჩასა და მიმდებარე ფერდებზე მეწყრული პროცესების ნაწილობრივ გააქტიურების გამო, მერიის მხრიდან შესაბამისი ღონისძიებები ტარდება. როგორც მან ჟურნალისტებთან განმარტა, მიმდინარეობს მეწყრული პროცესის მონიტორინგი და ასევე, დეტალური კვლევა ჩატარდება.

ამასთან, როგორც ირაკლი ბენდელიანმა აღნიშნა, პრობლემის მოგვარებაში მომდევნო კვირაში გერმანელი გეოინჟინრებიც ჩაერთვებიან.

„მაჭავარიანის ქუჩასა და მიმდებარე ფერდებზე ბოლო წლების განმავლობაში განხორციელებული მოქმედებების შედეგად, სტაბილიზაციაში მყოფი მეწყრული პროცესები ნაწილობრივ გააქტიურდა. ამ ფაქტის გამო, მერიის შესაბამისი სამსახურები დარგის შესაბამის სპეციალისტებთან ერთად ჩაერთნენ ამ პრობლემის მოგვარებაში. 24 საათიან რეჟიმში მიმდინარეობს ამ პრობლემის მოსაგვარებლად ღონისძიებები, არის რამდენიმე სახის რეკომენდაცია ექსპერტების მხრიდან, რომ პირველ რიგში მომხდარიყო მაჭავარიანის ქუჩის ჩაკეტვა, რაც მერიამ მოსახლეობას რამდენიმე დღის წინ შეატყობინა და ეს ქუჩა გადაიკეტა. ასევე, მათი რეკომენდაციაა, რომ მოხდეს მეწყრული პროცესის მონიტორინგი, რაც უკვე პირველივე წუთიდან მიმდინარეობს. ასევე, მათი რეკომენდაციაა, რომ მოხდეს დეტალური კვლევა, პროექტირება და შემდგომ შესაბამისი სამუშაოები განხორციელება, რაც უკვე მიმდინარეობს. კვლევა-პროექტირების ეტაპზე ვართ და უახლოეს დღეებში დასრულდება. ჩვენ გვექნება პირველადი მონაცემები, თუ რასთან გვაქვს საქმე, რა ღონისძიებები უნდა გატარდეს. ასევე, მომდევნო კვირაში გერმანელი გეოინჟინრები ჩამოგვყავს. ისინი მაღალი კვალიფიკაციის ხალხი არიან და ჩვენთვის მათი აზრიც მნიშვნელოვანია, ისინიც უშუალოდ ჩაერთვებიან ამ პროცესში. პირველ რიგში, მინდა მოსახლეობას ვუთხრა, ახლა პირველი რიგის ამოცანა არის, რომ მაჭავარიანის ქუჩა რაც შეიძლება მალე გაიხსნას, ოღონდ მხოლოდ და მხოლოდ მას შემდგომ, რაც დარწმუნებულები ვიქნებით, რომ ამ ქუჩაზე გადადგილება სრულიად უსაფრთხო იქნება“, - განაცხადა ბენდელიანმა.

მისი განმარტებით, მაჭავარიანისა და მარშალ გელოვნის ქუჩების დამაკავშირებელი ახალი გზის მშენებლობაზე სამუშაოების დაწყებამდე დეტალური პროექტი იყო გაკეთებული, იყო გეოლოგების დასკვნებიც, ჩატარებული იყო ექსპერტიზაც და ამის შემდეგ დაიწყო სამუშაოები.

კითხვაზე, ვისი პასუხისმგებლობა შეიძლება იყოს მეწყრული პროცესების გააქტიურება, მერის მოადგილემ უპასუხა, რომ ეს საკითხის დეტალური შესწავლის შემდეგ გაირკვევა.

„პასუხისმგებლობის საკითხი რომ დასვა და თქვა, რომ კონკრეტული პიროვნება ან ორგანიზაცია არის პასუხისმგებელი, მაშინ, პირველ რიგში, ზუსტად უნდა იცოდე, 100%-ით დარწმუნებული უნდა იყო, ამ მეწყერული პროცესის გამომწვევი მიზეზი. აქ არის რამდენიმე ფაქტორი, რასაც კონკრეტული და დეტალური კვლევები სჭირდება, რომ ზუსტად განისაზღვროს, რამ გამოიოწვია ეს ყველაფერი. თუმცა, იმის გათვალისწინებით, რომ ეს გზა არის ერთ-ერთი მნიშვნელოვანი კვანძი დედაქალაქისთვის, აუცილებელია დროულად გაიხსნას ეს გზა. ნომერ პირველი ამოცანა ამ ქუჩის უსაფრთხოდ გახსნაა, დანარჩენი, ეტაპობრივად ყველა მოქმედება განხორციელდება“, - განაცხადა ბენდელიანმა.

მან აღნიშნა, რომ როგორც მედიისთვის, ასევე საზოგადოებისთვის ყველა ინფორმაცია ღია და საჯარო იქნება.