კორონავირუსის საწინააღმდეგო ვაქცინით 65 წელს ზევით ასაკის მოქალაქეებიც აიცრებიან - რეგისტრაცია 25 მარტიდან დაიწყება

ჯანდაცვის მინისტრის, ეკატერინე ტიკარაძის განცხადებით, ვაქცინაციის პროცესში ასაკობრივი ჯგუფების დამატება მოხდება. უფრო კონკრეტულად კი, 65 წელს ზევით ასაკის საქართველოს მოქალაქეებისთვის ვაქცინაცია ხელმისაწვდომი იქნება.

როგორც მინისტრმა დღეს გამართულ ბრიფინგზე განმარტა, იქიდან გამომდინარე, რომ ეს ერთ-ერთ ყველაზე მოწყვლად ჯგუფად ითვლება, იმუნიზაციის ექსპერტთა საბჭომ პროცესების დაჩქარების გადაწყვეტილება მიიღო. 65 წელს ზევით ასაკის მოქალაქეები ვაქცინაციისთვის შესაბამისი რეგისტრაციის გავლას 25 მარტიდან შეძლებენ.

„დღეს დილიდან შეიკრიბა საბჭო სხვადასხვა მნიშვნელოვან თემებზე სამსჯელოდ. პირველი მთავარი ინფორმაცია, რაც არის საზოგადოებისთვის მნიშვნელოვანი, არის მსოფლიო ჯანდაცვის ორგანიზაციის მხრიდან მიღებული გადაწყვეტილება, რომელმაც „ასტრაზენეკა“ აღიარა, როგორც უსაფრთხო ვაქცინა და შესაბამისად, „ასტრაზენეკათი“ ვაქცინაცია მსოფლიოს ყველა ქვეყანაში შეუფერხებლად გაგრძელდება. გამომდინარე აქედან, საბჭომ ჩათვალა, რომ მნიშვნელოვანი იყო გვემსჯელა, თუ რა იქნებოდა საქართველოში შემდგომი ტაქტიკა ჯგუფებთან მიმართებით და ასევე, ლოკაციებთან მიმართებით. აქ ჩვენ გამოვიტანეთ მნიშვნელოვანი გადაწყვეტილება იმასთან დაკავშირებით, რომ მოხდება ასაკობრივი ჯგუფების დამატება ვაქცინაციის პროცესში, კერძოდ კი, 75 წელზე და 65 წელს ზევით ჩვენი მოქალაქეებისთვის შესაძლებელი იქნება ვაქცინაციაზე ხელმისაწვდომობა. ჩვენ ყველამ ვიცით, რომ სწორედ ეს ჯგუფებია ის მოწყვლადი ჯგუფები, ვისთვისაც კოვიდინფექცია არის ყველაზე საშიში ინფექცია და აქედან გამომდინარე, ჩვენ გადაწყვეტილება მივიღეთ, რომ პროცესი დაგვეჩქარებინა,“ - განაცხადა ტიკარაძემ.

ტიკარაძის განცხადებით, 65 წელს ზემოთ ასაკის მოქალაქეებისთვის, ვაქცინაციასთან დაკავშირებული რეგისტრაციის გავლის მიზნით, შესაბამისი პორტალი ხელმისაწვდომი 25 მარტიდან იქნება.

როგორც მან დღევანდელ ბრიფინგზე განმარტა, ამ პერიოდში მათ შესაძლებლობა ექნებათ, მიიღონ ყველა ის საჭირო ინფორმაცია, რომლითაც ისინი პორტალზე დარეგისტრირებას შეძლებენ.

„მნიშვნელოვანია, რომ ჩვენი მოქალაქეებისთვის პორტალი ხელმისაწვდომი იქნება 25 მარტიდან. წინა პერიოდში კი მათ შესაძლებლობა ექნებათ, მიიღონ ყველა ის საჭირო ინფორმაცია, რომლითაც ისინი მოახერხებენ პორტალზე დარეგისტრირებას. სამედიცინო პერსონალის კომპონენტში კი ვაქცინაციის პროცესი გაგრძელდება. უბრალოდ, 25 მარტის შემდეგ, ჩვენი ექიმები ვერ გამოიყენებენ იმ განსაკუთრებული რიგის მართვის კომპონენტს, რომელზე ხელმისაწვდომობაც მათ ამ პერიოდშიც ჰქონდათ“, - განაცხადა ტიკარაძემ.

ვაქცინაციისთვის ვიზიტის დაჯავშნა მოქალაქეებს შეუძლიათ ბმულზე.