"ექთანს კოვიდზე ტესტი 18 მარტს ჩაუტარდა და უარყოფითი პასუხის შემდეგ, იმავე დღეს აიცრა, კორონავირუსი კი 20 მარტს დაუდასტურდა" - პენიტენციური სამსახური
სპეციალური პენიტენციური სამსახურის ინფორმაციით, დაწესებულების ექთანს, ტესტი კორონავირუსზე 18 მარტს ჩაუტარდა, უარყოფითი პასუხის შემდეგ კი იმავე დღეს "ასტრაზენეკას“ ვაქცინით აიცრა.
როგორც პენიტენციური სამსახურში "ინტერპრესნიუსს“ განუცხადეს, კორონავირუსი ექთანს 20 მარტს მას შემდეგ დაუდასტურდა, რაც წინა დღეს კორონავირუსის დიაგნოზი მის მეუღლეს დაუსვეს.
"Covid-19-ის შესაძლო გავრცელების პრევენციის მიზნით, 2020 წლის მაისის ბოლოდან პენიტენციური სისტემის თანამშრომლები ორ კვირაში ერთხელ გადიოდნენ PCR ტესტირებას, ხოლო 2020 წლის ოქტომბრიდან, ქვეყანაში შექმნილი ეპიდსიტუაციიდან გამომდინარე, მათ კვირაში ერთხელ უტარდებათ PCR ტესტირება, ხოლო შუალედში, ყოველ 72 საათში ერთხელ სწრაფი ანტიგენ ტესტით მოწმდებიან.
ამ სამედიცინო პროტოკოლის შესაბამისად, N5 დაწესებულების ექთანს მიმდინარე წლის 15 მარტს ჩაუტარდა PCR ტესტირება (პასუხი უარყოფითი), ხოლო 18 მარტს სწრაფი ანტიგენის ტესტით შემოწმდა (პასუხი კვლავ უარყოფითი იყო). ამავე დღეს მას გაუკეთდა აცრა covid-19-ზე. მეორე დღეს, 19 მარტს მის მეუღლეს დაუდგინდა covid-19, ხოლო თავად ექთანსაც გამოუვლინდა covid-19-ისთვის დამახასიათებელი სიმპტომები (ტემპერატურის მატება). იგი მოთავსდა სპეციალიზებულ ე.წ. კოვიდკლინიკაში, სადაც 20 მარტს დაუდასტურდა covid-19. მისი მდგომარეობა დამაკმაყოფილებელია და უახლოეს დღეებში დატოვებს კლინიკას“,- აცხადებენ პენიტენციურ სამსახურში.
ცნობისთვის, ექთანი ინფექციურ საავადმყოფოშია მოთავსებული. როგორც „ინტერპრესნიუსს“ კლინიკაში განუცხადეს, პაციენტის მდგომარეობა მსუბუქია და მას დაავადებისთვის დამახასიათებელი საერთო სისუსტე აღენიშნება.
"ხათუნას დილითვე ვკითხე და არც ახსოვდა ამ კომპანიების არსებობა" - რა ხარვეზი უპოვეს ზურა ხაჩიძეს ქონებრივ დეკლარაციაში და რას პასუხობს მომღერალი კვლევას?
"გამოვლინდა მეწყრული ზონა, საჭიროა პრევენციული ზომების მიღება" - ბაგები-წყნეთის დამაკავშირებელ გზაზე საავტომობილო გადაადგილება იზღუდება
