კორონავირუსის "მესამე ტალღა" მეზობელ ქვეყნებში? - როგორია ეპიდვითარება სომხეთში, აზერბაიჯანში, თურქეთსა და რუსეთში

მსოფლიოს სხვადასხვა ქვეყნების ეპიდემიოლოგები და ხელისუფლების წარმომადგენლები უკვე აქტიურად ლაპარაკობენ კორონავირუსის მოსალოდნელ მესამე ტალღაზე, ზოგან კი უკვე ოფიციალურადაც გამოაცხადეს ვირუსის აფეთქების ახალი ტალღა. ინფიცირებულთა რაოდენობა იმატებს ჩვენს მეზობელ ქვეყნებშიც.

ვნახოთ, როგორია ეპიდემიოლოგიური ვითარება სომხეთში, აზერბაიჯანში, თურქეთსა და რუსეთში:

სომხეთი

კორონავირუსით ინფირიცირებულთა რაოდენობა სომხეთში იზრდება. ბოლო სამი დღის სტატისტიკა ასეთია:

• 22 მარტი - 506 შემთხვევა
• 23 მარტი - 801 შემთხვევა
• 24 მარტი - 1164 შემთხვევა.

ამასთანავე, საერთო ჯამში, სომხეთში კორონავირუსის 187 441 შემთხვევაა გამოვლენილი, გარდაცვლილია 3 416 პაციენტი, ხოლო 169,727 გამოჯანმრთელდა. აღსანიშნავია, რომ სომხეთში ვაქცინაცია ჯერჯერობით აქტიურად არ მიმდინარეობს. ოფიციალურად პროცესი 11 მარტს დაიწყო. რუსეთმა მათ 2 000 დოზა რუსული ვაქცინა Sputnik V აჩუქა, რომელიც 1 000 ადამიანზეა გათვლილი.

მასშტაბური ვაქცინაციის დაწყება აპრილშია დაგეგმილი, სომხეთმა რუსეთისგან შეიძინა Sputnik V-ის 15 ათასი დოზა, გარდა ამისა, ქვეყანაში ელოდებიან "ასტრაზენეკას" ვაქცინასაც, რაც შეეხება "ფაიზერს", სომხეთში აცხადებენ, რომ მისი შენახვისთვის საჭირო პირობები ჯერჯერობით არ აქვთ.

აზერბაიჯანი

აზერბაიჯანში კორონავირუსით ინფიცირების მაჩვენებლის მკვეთრად მატება შეინიშნება 16 მარტიდან და ბოლო დღეებია ქვეყანაში ყოველდღიურად ინფიცირებულთა რაოდენობა 1000-ს აჭარბებს. გაეცანით ბოლო სამი დღის სტატისტიკას:

• 22 მარტი - 670 შემთხვევა
• 23 მარტი - 1333 შემთხვევა
• 24 მარტი - 1 185 შემთხვევა.

აზერბაიჯანში ვირუსის გამოვლენის დღიდან ამ დრომდე აღწერილია კორონავირუსის 249 492 შემთხვევა, რომელთა შორისაც 3 404 პაციენტი გარდაიცვალა, ხოლო 233,834 გამოჯანმრთელდა.

ქვეყანაში ვაქცინაციის პროცესი 18 იანვარს დაიწყო. 21 მარტის მონაცემებით, ვაქცინაცია ჩაუტარდა 482 664 ადამიანს. აზერბაიჯანში ჩინურ Sinovac-ის ვაქცინას იყენებენ.

თურქეთი

თურქეთში ინფიცირებულთა ყოველდღიური რაოდენობა 20 000-ს აჭარბებს. გასული სამი დღის მაჩვენებელი ასეთია:

• 22 მარტი - 22 216 შემთხვევა
• 23 მარტი - 26 182 შემთხვევა
• 24 მარტი - 29 762 შემთხვევა.

თურქეთში კორონავირუსით ინფიცირებულთა საერთო რაოდენობა 3 მილიონს აღემატება და ამ მონაცემებით, ის მსოფლიოს მეცხრე ქვეყანაა. ვირუსს თურქეთში 30 462 ადამიანი ემსხვერპლა, 2,8 მილიონი კი გამოჯანმრთელდა.

ამასთან, "ბლუმბერგის" მონაცემებით, თურქეთში კორონავირუსის საწინააღმდეგო ვაქცინის ერთი დოზა მიღებული აქვს 8,15 მილიონ ადამიანს. ქვეყანაში ვაქცინაცია ჩინური Sinovac-ით მიმდინარეობს.

რუსეთი

ოფიციალური მონაცემებით რუსეთში 8 მარტის შემდეგ ინფიცირებულთა ყოველდღიური რაოდენობა 10 000-ს არ აჭარბებს და 8 მარტამდელ პერიოდთან შედარებით, ეს შესაძლოა, სტაბილურ მაჩვენებლად მივიჩნიოთ. ბოლო სამი დღის სტატისტიკა ასეთია:

• 22 მარტი - 9 284 შემთხვევა
• 23 მარტი - 8 457 შემთხვევა
• 24 მარტი - 8 861 შემთხვევა

საერთო ჯამში, რუსეთში კორონავირუსის 4,4 მილიონი შემთხვევაა აღწერილი, რომელთა შორისაც ოფიციალური მონაცემებით გარდაიცვალა 96 219 პაციენტი, ხოლო 4 მილიონი გამოჯანმრთელდა. "ბლუმბერგის" თანახმად, რუსეთში ვაქცინის ერთი დოზა მაინც მიღებული აქვს 4,3 მილიონ ადამიანს. ქვეყანაში აცრის პროცესი რუსული წარმოების ვაქცინით მიმდინარეობს.

წყარო: bloomberg.com

worldometers.info

sova.news