საქართველო-ესპანეთის საფეხბურთო მატჩის პირველი ტაიმი ქართველების გამარჯვებით დასრულდა - გოლი ხვიჩა კვარაცხელიამ გაიტანა

საქართველოს ეროვნული საფეხბურთო ნაკრების ნახევარმცველმა ხვიჩა კვარაცხელიამ პირველი გოლი გაიტანა. მატჩის პირველი ტაიმი დასრულდა.

ფიფას 2022 წლის მსოფლიო ჩემპიონატის საკვალიფიკაციო ეტაპის მეორე ტურის მატჩი თბილისის „დინამო არენაზე“ 20:00 საათზე დაიწყო.

გუნდების სასტარტო შემადგენლობები ასეთია:

საქართველო: ლორია, კაკაბაძე, კაშია, დვალი, გიორბელიძე, გვილია, კანკავა, კვარაცხელია, კიტეიშვილი, ლობჟანიძე, ზივზივაძე

ესპანეთი: სიმონი, ალბა, ლორენტე, ერიკ გარსია, პედრო პორო, პედრი, ბუსკეტსი, რუისი, ხილი, მორატა, ტორესი

როგორც ცნობილია, საქართველო-ესპანეთის საფეხბურთო მატჩის გამო, თბილისის მეტრო და ავტობუსები 01:00 საათამდე იმუშავებს. აღნიშნულ ინფორმაციას მთავრობის უწყებათაშორისი საკოორდინაციო საბჭო ავრცელებს.

მათივე ინფორმაციით, ის პირები, რომლებსაც მატჩზე დასასწრები ბილეთები აქვთ, 01:00 საათამდე გადაადგილების ნებართვით ისარგებლებენ.

უწყებათაშორისი საბჭო გულშემატკივარს მოუწოდებს, გამოიჩინონ მაღალი პასუხისმგებლობა და დაიცვან ყველა შესაბამისი რეგულაცია, მათ შორის, რიგში დგომისას, რასაც შესაბამისი უწყებები გააკონტროლებენ.