"ოქრუაშვილმა ჩემი ტიტველი ფოტო გამოფინა, რომელიც სუს-მა ვაიბერის ჩანაწერით ამოაგდო" - გიორგი ვაშაძე

"სტრატეგია აღმაშენებლის" თავმჯდომარის გიორგი ვაშაძის თქმით, ირაკლი ოქრუაშვილმა "ფეისბუქზე" მისი ტიტველი ფოტო გამოფინა, რომელიც სუს-მა ვაიბერის ჩანაწერით ამოაგდო.

ამის შესახებ ვაშაძემ "კავკასიის" ეთერში განაცხადა.

"ირაკლი ოქრუაშვილმა ჩემი ტიტველი ფოტო გამოფინა, რომელიც სუს-მა ამოაგდო ვაიბერის ჩანაწერით. ეს რა პოლიტიკაა, გამაგებინეთ. ტიტველი ფოტო გამომიფინა კაცმა. უბრალოდ, ზნეობა ხო არსებობს. ღმერთმა დამიფაროს, მტერიც რომ იყოს, იმის ტიტველი ფოტო გამოვფინო" - აღნიშნა ვაშაძემ.

მის განცხადებას მალევე უპასუხა ირაკლი ოქრუაშვილმა:

"მეფეა ტიტველი გოგიტაჯან და შენ მასთან შედარებით ვასალი კი არა პლებეა ხარ, რა ჩემი ბრალია. შენ და ხაზარაძე ნიკა მელიას გაშავებას ცდილობთ და ჩვენ რომ "გაგატიტვლოთ" ეგ რატომ არ მოსულა? შენმა "სიშიშვლემ" ქვეყანა მოიცვა და ეგ ჩვენ არ გვიქნია, თავად მიაღწიე მაგას" - დაწერა ოქრუაშვილმა "ფეისბუქზე".