ჭიათურაში პროტესტი გრძელდება - გაფიცული მაღაროელები ხელფასის 50%-ით მომატებას მოითხოვენ

ჭიათურაში მაღაროელები კვლავ გაფიცულები არიან. ისინი ხელფასის 50-%-ით მატებას ითხოვენ და აცხადებენ, რომ მათი შრომითი ხელშეკრულება გარკვეულ ჩასწორებებს საჭიროებს.

როგორც მაღაროელები აცხადებენ, ისინი გაფიცვას იქამდე გააგრძელებენ, სანამ მათი მოთხოვნები არ დაკმაყოფილდება.

"ვითხოვთ 50%-იან ხელფასის მატებას, ინფლაციასთან მიბმას და შრომითი ხელშეკრულების გაფორმებას, სხვა ჩვენ ამ ეტაპზე არავითარი მოთხოვნები არ გვაქვს.

არის შემოთავაზება მაისის თვისთვის ხელფასის 250 ლარით მატების, მაგრამ ჩვენ ეს არ გვაკმაყოფილებს, ჩვენ ვითხოვთ 50%-იან ხელფასის მატებას, ინფლაციასთან მიბმით.

თუ არ დაკმაყოფილდა ჩვენი მოთხოვნა, ამ შემთხვევაში ვაგრძელებთ გაფიცვას, მშვიდობიან გაფიცვას, როგორც ვდგავართ ისე ვიდგებით. ამ დროისთვის ყველა მაღარო და საწარმო გაჩერებულია", - განაცხადა ერთ-ერთმა მაღაროელმა ბესიკ კაპანაძემ.