"აქვს ტემპერატურა, თუმცა შინ გადის მკურნალობის კურსს" - უცნობი, ოჯახის წევრებთან ერთად, კორონავირუსით დაინფიცირდა

მომღერალსა და საზოგადოებრივი მოძრაობის "აი ია" დამფუძნებელ გია გაჩეჩილაძეს (უცნობი) კორონავირუსი დაუდასტურდა. ინფორმაცია ამის შესახებ თავდაპირველად "ფეისბუქგვერდმა" "აი უცნობი“ გაავრცელა.

"ჩვენთანაც მოვიდა კორონა", - დაწერა "ფეისბუქის" პირად გვერდზე უცნობის ქალიშვილმა ირინა გაჩეჩილაძემ.

ambebi.ge გია გაჩეჩილაძის ახლობელს დაუკავშირდა, რომელმაც გვითხრა, რომ გადაცემა "უცნობის კიდობანის“ წამყვანი რამდენიმე დღეა ვირუსით დაინფიცირდა. ვირუსი აღმოაჩნდა გაჩეჩილაძის ოჯახის წევრებსაც - შვილს, სიძეს და შვილიშვილს. "გია გაჩეჩილაძეს აქვს ტემპერატურა, თუმცა შინ გადის მკურნალობის კურსს. მისი ჯანმრთელობის მდგომარეობა რთული არ არის", - გვითხრა უცნობის ახლობელმა .