ღაზიდან სარაკეტო თავდასხმას ისრაელი სახმელეთო და საჰაერო იერიშით პასუხობს - როგორია ვითარება კონფლიქტის ზონაში (ფოტოები)

ისრაელი, იმ ფონზე, რომ ღაზას სექტორიდან სარაკეტო იერიშები გრძელდება, თავადაც აფართოებს შეტევას ღაზაზე. რამდენიმე საათის წინ ისრაელის თავდაცვის ძალებმა“ტვიტერში” განცხადება გაავრცელეს, სადაც ნათქვამი იყო, რომ ღაზაში სახმელეთო შეტევა დაიწყეს,

თუმცა, მოგვიანებით განმარტება გააკეთეს და განაცხადეს, რომ სახმელეთო ჯარები ღაზას ტერიტორიაზე არ შეჭრილან და საარტილერიო შეტევა სასაზღვრო ზონებიდან განხორციელდა.

BBC-ის რეპორტიორი ღაზიდან იუწყება, რომ ღაზა დაბომბეს საბრძოლო ვერტმფრენებიდან და იყო ინტენსიური შეტევა.

• ღაზას სექტორის ჯანდაცვის სამინისტროს ინფორმაციით, ისრაელის მიერ განხორციელებული ავიაიერიშების შედეგად დაღუპულია 115 პალესტინელი. მათივე ინფორმაციით, დაშავებულთა რიცხვი 600-მდე გაიზარდა.

ამასთან, ისრაელის მტკიცებით, დაღუპულთა უმრავლესობა ტერორისტული დაჯგუფების წევრები არიან.

გარდა ამისა, ისრაელში ებრაელებსა და არაბებს შორის შეტაკებებია, რის გამოც ათობით ადამიანია დაკავებული. Times of Israel-ის ცნობით, მუსმუსში, ხაიფას მახლობლად, პოლიციამ 11 პირი დააკავა, რომლებიც ქვებს ისროდნენ, საბურავებს წვავდნენ და შუქნიშნებს აზიანებდნენ.

სამი ადამიანი დააკავეს თელ-ავივში, რომლებსაც, არეულობის გამოწვევის მიზნით, ცივი იარაღები ჰქონდათ.

ამასთან, პოლიციის განცხადებით, 13 ადამიანი დააკავეს ქალაქ ბეერ-შევაში. დაკავებულები სხვადასხვა სახის ხელნაკეთი იარაღით იყვნენ შეიარაღებული.